Շիրակի մարզպետի աշխատակազմ

Այսօր ճանաչողական այցի շրջանակներում Գյումրի էր ժամանել Հայաստանի Հանրապետությունում Բելառուսի Հանրապետության արտակարգ և լիազոր դեսպան պարոն Ստեփան Սուխարենկոն: Այցի հիմնական նպատակը մեկն էր, շարունակել և նոր մոտեցումներ հաղորդել արդեն իսկ սկսված համագործակցությանը, առաջիկայում նոր համագործակցության համար կնքել կամ թարմացնել արդեն իսկ եղած պայմանագրերը Շիրակի և Գրոդնոյի մարզերի տնտեսավարող սուբյեկտների միջև կապերի ստեղծման, փորձի փոխանակման խթանման, մասնավորապես գյուղատնտեսության, զբոսաշրջության, կրթության և մշակութային ոլորտներում:

2009 թվականի հոկտեմբերի 31-ին Բելառուսի Հանրապետության արտաքին գործերի նախարար Սերգեյ Նիկոլայի Մարտինովի ՀՀ Շիրակի մարզ կատարած այցելության շրջանակներում ՀՀ Շիրակի մարզի և ԲՀ Գրոդնոյի շրջանի միջև կնքվել է առևտրա-տնտեսական, գիտատեխնիկական և մշակութային համագործակցության մասին համաձայնագիր: Այցի ընթացքում Գյումրիում տեղի է ունեցել Սերգեյ Մարտինովի պատվին անվանական ցուցատախտակի հանդիսավոր բացման արարողություն՝ Աբովյան փողոցի այն բնակարանի պատին, որտեղ բնակվել է նախարարի ընտանիքը:

Կնքված միջմարզային համաձայնագրի շրջանակներում ԲՀ Գրոդնոյի շրջանային գործադիր կոմիտեի նախագահի ժամանակավոր պաշտոնակատար Իվան Ալեյզիի Ժուկի հրավերով 2010 թվականի ապրիլի 19-ից-21-ը ՀՀ Շիրակի մարզպետ տիկին Լիդա Բալաբեկի Նանյանի գլխավորած պատվիրակությունն այցելել է ԲՀ Գրոդնոյի մարզ:

Այցի ընթացքում պատվիրակությանը ներկայացվել է Գրոդնոյի մարզի տնտեսության կարևորագույն ոլորտները, արդյունաբերության ճյուղերն ու դրանց հզորությունները, հանդիպումների ժամանակ քննարկվել են համագործակցության ծրագրերի իրականացման հնարավորությունները:

2010 թվականի ապրիլի 20-ին ՀՀ Շիրակի մարզպետ տիկին Լ. Նանյանի և ԲՀ Գրոդնոյի մարզի Լիդայի շրջանային գործադիր կոմիտեի նախագահ Ա. Խուդիկի միջև ստորագրվել է Մտադրությունների մասին արձանագրություն՝ հետագա համագործակցության վերաբերյալ: