Շիրակի մարզպետի աշխատակազմ

ՏԻՄ 15 ամյակի միջոցառումների շրջանակում այսօր Ազգային գեղագիտական կենտրոնի Գյումրու մասնաճյուղում բացվեց Արխիվային գործի ցուցահանդես, որտեղ ներկայացված էր 1924 թվականից Ալեքսանդրապոլում հիմնադրված արխիվի բացառիկ նմուշներ: Մարզային արխիվը, որն սպասարկում է մարզի Գյումրու, Ախուրյանի և Ամասիայի տարածաշրջաններն, այսօր իր հարկի ներքո պահում և պահպանում է շուրջ 113 հազար 800 փաստաթուղթ: Հիմնականում պահպանվում են բնակչությանը վերաբերվող կարևոր փաստաթղթեր, որոշումներ ու նախագծեր, որոնց արդյունքում Ալեքսանդրապոլը վերանվանվել է Գյումրի, Գյումրիում հիմնադրվել է առաջին երաժշտական դպրոցը, առաջին բնակելի շենքի կառուցման նախագիծն ու առաջին ընտրության վերաբերյալ շատ արժեքավոր փաստաթղթեր: Ողջունելով ցուցահանդեսի մասնակիցներին ՏԻՄ 15 ամյակի կապակցությամբ, մարզային արխիվի տնօրեն տիկին Սուսաննա Մկրտչյանը համառոտ ներկայացրեց արխիվում պահպանվող ոչ միայն կարևոր փաստաթղթերի, այլև մարզի և Գյումրի քաղաքի անվանի մարդկանց կենսագրության և ապրած կյանքի վերաբերյալ պատմափաստագրական նյութեր: Ցուցահանդեսը կգործի ևս մի քանի օր, և ցանկացողներն ավելի մոտիկից կծանոթանան արխիվում պահպանվող շատ կարևոր փաստաթղթերի հետ, որոնք արդեն վաղուց դարձել են պատմություն, իսկ հարուստ է այն ազգը, ում արխիվային փաստաթղթերն այդչափ հին են  ու բազմաբովանդակ, որքան Հայ ժողովրդինը: