Շիրակի մարզպետի աշխատակազմ

Մարզի համայնքներում երկրաշարժից դեռևս անօթևան մնացած ընտանիքների բնակարանային խնդրի լուծման նպատակով Գյումրի քաղաքի <<Մուշ-2-2>> և <<Անի>> թաղամասերում իրականացվում է 1756 բնակարաններով թվով 38, իսկ Ախուրյան գյուղում 108 բնակարաններով՝ 3 բազմաբնակարան շենքերի կառուցումը: Մնացած համայնքներում բնակելի տների կառուցումը սկսվելու է 2012 թվականին:

Ամանորի նախաշեմին` դեկտեմբերի 27-ին Գյումրու թիվ 21 դպրոցի դահլիճում տեղի ունեցավ Գյումրու անօթևան ընտանիքների հերթացուցակում փաստագրված չորս սենյականոց բնակարանների շահառուների բնակարանների վիճակահանությունը: Վիճակահանությանը մասնակցում էին բնակարանների բաշխման հանձնաժողովի նախագահ` ՀՀ քաղաքաշինության նախարար Վարդան Վարդանյանը, ՀՀ Շիրակի մարզպետ Աշոտ Գիզիրյանը, Գյումրու քաղաքապետ Վարդան Ղուկասյանը, մարզպետարանի և քաղաքապետարանի, լրատվամիջոցների ներկայացուցիչներ: Մինչև վիճակահանության սկիզբը հանձնաժողովի նախագահ Վարդան Վարդանյանը դիմեց վիճակահանության մասնակիցներին, թվով 109 չորս սենյականոց բնակարանի կարիքավոր ընտանիքներից 21 առաջին կարգի հաշմանդամներին առանձին վիճակահանությամբ առաջին հարկի բնակարանները տրամադրելու հարցով: Տարօրինակն այն էր, որ վիճակահանության մասնակիցները համաձայնեցին, իսկ իրենք հաշմանդամները հրաժարվեցին, և առանձին վիճակահանությանը մասնակցեցին վեց ընտանիք: Մեկ ընտանիք ընդհանրապես հրաժարվել է բնակարան ստանալուց, պատճառաբանելով, որ իր նկատմամբ անարդարացի են վարվել և զրկել են մեկ սենյակի իրավունքից: Անկախ ամեն ինչից, 108 ընտանիք ամանորին ընդառաջ իրենց իսկ վիճակահանությամբ դարձան բնակարանատեր: Արդեն եկող տարի գարնանը այս ընտանիքները, ինչպես նաև այլ ուրիշ ընտանիքներ, որոնք կմասնակցեն վիճակահանության, կտոնեն բնակարանամուտ: