Շիրակի մարզպետի աշխատակազմ

1990 թվականին, երկրաշարժից անմիջապես հետո, Շիրակի մարզի Աշոցքի նախկին տարածաշրջանի Աշոցքի շրջանային գործկոմի նախագահ, ներկայիս Շիրակի մարզպետի տեղակալ Սեյրան Պետրոսյանի անմիջական նախաձեռնությամբ և մասնակցությամբ Աշոցք գյուղի մի հատվածում պետական բյուջեի միջոցների հաշվին փորվեցին հիմքեր, անցկացվեցին կոմունիկացիաներ, տարածքը պարսպապատվելուց և բարեկարգվելուց հետո տրամադրվեց Կամիլլիանների Միաբանության Սրբ. Կամիլլո Բարեգործական հիմնադրամին, ում ֆինանսական աջակցությամբ հիմնադրվեց Աշոցքի Տիրամայր Նարեկի հիվանդանոցը: 1991 թվականի հոկտեմբերի 9-ին հիվանդանոցը հանձնվեց շահագործման, բացման հանդիսավոր արարողությանը մասնակցում էր Վատիկանի արևելյան եկեղեցիների ժողովի նախագահ կարդինալ Սելվինստրին: Ներկայիս առողջապահության նախարար Դերենիկ Դումանյանը հանդիսավոր արարողությանը մասնակցում էր որպես առողջապահության փոխնախարար: Այսօր, հուլիսի 18-ին` քսան տարի անց, կրկին Շիրակի մարզի Աշոցքի համայնք էին ժամանել Վատիկանի արևելյան եկեղեցիների ժողովի նախագահ կարդինալ Լեոնարդո Սանդրինին, բարձրաստիճան հոգևորականներ Հռոմից և Վատիկանից, ՀՀ առողջապահության նախարար Դերենիկ Դումանյանը, Շիրակի մարզպետի տեղակալ Հարություն Արշակյանը, բազմաթիվ հյուրեր Իտալիայից: Ցավոք, աշխատանքի բերումով մայրաքաղաքում խորհրդակցության մասնակցելու պատճառով, այդ տոնական և հիշարժան օրվա կապակցությամբ միջոցառմանը չէր մասնակցում Տիրամայր Նարեկի հիվանդանոցի հիրավի հիմնադիր համարվող Սեյրան Պետրոսյանը: 1992 թվականից հիվանդանոցը սկսեց գործել: Հետագա տարիներին բուժհաստատությունը վերանորոգվել է Սուրբ Կամիլլիո բարեգործական հիմնադրամի միջոցներով: «Տիրամայր Նարեկի» բարեգործական հիվանդանոցն արդեն երկու տասնամյակ անվճար բժշկական օգնություն է ցուցաբերում դրա կարիքն ունեցող բոլոր դիմողներին: Հաստատությունում բուժում են ստանում են ինչպես մարզի, այնպես էլ Ջավախքի բնակիչները: Այն ունի 100 մահճակալից բաղկացած ստացիոնար (վիրաբուժական, մանկաբարձա-գինեկոլոգիական, թերապևտիկ և մանկական բաժանմունքներ): Հիշյալ բաժանմունքներ այցելեցին առողջապահության նախարար Դերենիկ Դումանյանը, կարդինալ Լեոնարդո Սանդրինին: Նախարարը հարցազրույցի ժամանակ նշեց, - ինչոր քսան տարի առաջ ես տեսել եմ այս հիվանդանոցը, այդպես էլ այսօր, Ձեզ հետ միասին տեսնում եմ, և դա շնորհիվ բարեխիղճ և սրտացավ մարդկանց նվիրված աշխատանքի, ով իրոք համարում է հիվանդանոցն իր տունը: Շրջայցի ավարտին հիվանդանոցի մի հատվածում տեղի ունեցավ հանդիսավոր արարողություն հիվանդանոցի հիմնադրման 20 ամյակի առիթով: Հյուրերին իրենց ջերմ բարեմաթղանքները հղեցին Դերենիկ Դումանյանը, Շիրակի մարզպետի տեղակալ Հարություն Արշակյանը, Տիրամայր Նարեկի հիվանդանոցի տնօրեն Հայր Մարիո Կուկկարոլլոն: Տոնական միջոցառումն ավարտվեց Գյումրու ժողովրդական գործիքների և պարային համույթների ելույթներով: