Շիրակի մարզպետի աշխատակազմ

Գյումրու Սավոյան 9 հասցեում  գտնվող <Արյան փոխներարկման կայան>-ի նախկին շենքը <Պաթոլոգո-անատոմիական լաբորատորիա> վերակառուցելու որոշման առնչությամբ հարկ ենք համարում պարզաբանել, որ  <Գյումրու պաթոլոգո-անատոմիական լաբորատորիա> ՓԲԸ-ն լինելով մարզում միակ կազմակերպությունը սպասարկում է Շիրակի մարզի ազգաբնակչությանը: Բոլորին հայտնի է, որ լաբորատորիայի շենքը գտնվում է անմխիթար վիճակում:  Խնդրի անհապաղ լուծման անհրաժեշտությամբ պայմանավորված ՀՀ Շիրակի մարզպետարանը դիմել էր ՀՀ նախագահին, ՀՀ վարչապետին եւ ՀՀ առողջապահության նախարարին: Հարցը կարգավորելու համար գումարներ հատկացվել են արդեն Հայաստանի Սոցիալական ներդրումների հիմնադրամի միջոցներից: Հատուկ կազմված հանձնաժողովը, որում ընդգրկված են եղել շահագրգիռ բոլոր կազմակերպությունների ներկայացուցիչները, ուսումնասիրել եւ քննարկել են <Պաթոլոգո-անատոմիական լաբորատորիայի> շենքի կառուցման մի շարք առաջարկություններ: Համակողմանի քննարկման արդյունքում ընտրվել է  Սավոյան 9 հասցեում գտնվող <Արյան փոխներարկման կայան>-ի նախկին շենքը, որի   վերակառուցման արդյունքում մարզն ունենալու է ամենաժամանակակից սարքավորումներով հագեցած հաստատություն:

  Առկա է ՀՀ առողջապահության նախարարության համաձայնությունը:

 Պետք է փաստել, որ   բնակչությանը սպասարկելու առումով նպատակահարմար է գտնվել նշված շենքի ընտրությունը, քանզի այն չի հակասում որեւէ քաղաքաշինական դրույթի: Շենքի վերականգնման նախագիծը մշակվում է նորմատիվատեխնիկական փաստաթղթերի պահանջներից ելնելով եւ ՀՀ օրենսդրությամբ սահմանված կարգով կենթարկվի փորձաքննության: 

 Համաշխարհային պրակտիկայում եւս որեւէ փաստ չկա, որ այսօրինակ կառույցները պարտադիր է կառուցել քաղաքից դուրս կամ լրիվ անմարդաբնակ վայրերում, ճիշտ հակառակ` մի շարք քաղաքներում դրանք կառուցված են անգամ ամենախիտ բնակեցված թաղամասերում:  

Այս բոլոր փաստարկներից հետո պետք է ընդգծել, որ նոր լաբորատորիայի կառուցումը հանգեցնելու է մարզում բժշկական այս ծառայությունների առավել որակյալ եւ ժամանակակից չափորոշիչներին համապատասխան իրականացմանը: