Շիրակի մարզպետի աշխատակազմ

Էլեկտրական էներգիայի մատակարարման և օգտագործման կանոնների (այսուհետ` կանոններ) 27-րդ կետի` մատակարարը սպառողի էլեկտրամատակարարման պլանային ընդհատումը պետք է իրականացնի աշխատանքային օրերին` ժամը 9:00-17:00-ն ընկած ժամանակահատվածում, սակայն ոչ ավելի, քան 6 ժամ տևողությամբ: Կանոնների 28-րդ կետի համաձայն` մատակարարը սպառողի էլեկտրամատակարարումը պարտավոր է վերականգնել արտապլանային ընդհատման պահից ոչ ուշ, քան`

·         2 ժամում` քաղաքային և գյուղական համայնքների վարչական տարածքի սահմաններում, ինչպես նաև բնակավայրերի սահմաններից դուրս գտնվող այն սպառողների դեպքում, որոնց էլեկտրամատակարարումը նախատեսված է իրականացնել 6 կՎ և բարձր լարման մեկից ավելի առանձին օդային (մալուխային) գծերով կամ էլեկտրակայանի (ենթակայանի) երկու հոծանային համակարգերից կամ սեկցիաներից,

·         4 ժամում` քաղաքային համայնքների վարչական տարածքի բնակավայրի սահմանում գտնվող սպառողների դեպքում,

·         8 ժամում` գյուղական համայնքների վարչական տարածքի բնակավայրի սահմանում գտնվող սպառողների դեպքում,

·         12 ժամում` քաղաքային և գյուղական համայնքների վարչական տարածքի բնակավայրի սահմաններից դուրս գտնվող սպառողների դեպքում:

Կանոնների 77-րդ կետի ա) և բ) ենթակետերի համաձայն, 27-րդ և 28-րդ կետերով սահմանված ժամկետների խախտման համար մատակարարը պարտավոր է սպառողին վճարել տույժ` ծախսված էլեկտրաէներգիայի միջին ամսական արժեքի 20 տոկոսի չափով, բայց ոչ ավելի, քան 2000 դրամը, ընդ որում, տույժի վճարման գործընթացը մատակարարի կողմից պետք է իրականացվի ավտոմատ եղանակով` առանց սպառողի կողմից որևէ դիմում կամ փաստաթուղթ ներկայացնելու պահանջի: Վճարվող տույժի չափը պետք է առանձին տողով նշված լինի տվյալ հաշվարկային ամսվա համար սպառողին ներկայացվող վճարման փաստաթղթում:

Միևնույն ժամանակ հարկ է նշել, որ կանոնների 80-րդ կետի համաձայն` մատակարարը վերը նշված խախտումների համար տույժ չի վճարում, եթե դրանք հետևանք են արտակարգ և անկանխելի դեպքերի և հանգամանքների: