Պաշտոնական էլ. փոստ
(միայն www.e-citizen.am համակարգով ծանուցումների համար)
Նորություններ
Լիոնից ժամանած բժիշկները մարզպետի հյուր
12.05.2014
Մայիսի 12-ին Շիրակի մարզպետն հանդիպեց Ֆրանսիայի Լիոն քաղաքից Գյումրի ժամանած հոգեբույժ-մասնագետների, ովքեր մեկ շաբաթ կհյուրընկալեն Գյումրիում և դասընթացներ ու սեմինարներ կանցկացնեն տեղի մասնագետների համար: Հյուրերին Շիրակի մարզպետի մոտ ուղեկցում էր Գյումրու Հոգեկան առողջության կենտրոնի տնօրեն Նադյա Վարդանյանը: Ողջունելով նրանց Ֆելիքս Ցոլակյանը նշեց, որ չափազանց կարևոր է, որ նույն մասնագիտությամբ մարդիկ հանդիպում են և փորձի ու գիտելիքների փոխանակում է լինում: <Ես վստահ եմ ձեր այցելությունը երկուստեք օգտակար է լինելու: Մեզ մոտ, իհարկե, պայմաններն ու հնարավորություններն այն չեն, ինչ Ֆրանսիայում են, սակայն մեր բժիշկ-մասնագետներն ամեն ինչ անում են հիվանդներին հնարավորությունների սահմաններում օգնելու և բուժելու համար, խոսքս հատկապես հոգեկան հիվանդությունների մասին է: Շիրակի մարզում այսօրինակ խնդիրներն առավել ակտուալ են վերջին տարիներին, քանի որ մենք երկրաշարժ տեսած մարզ ենք և այժմ սերունդներն այդ երկրաշարժի ազդեցությունն իրենց վրա իսկապես զգում են>,-ասաց պարոն Ցոլակյանը:
Լիոնի Վինաթիեր հոգեբուժարանի տնօրեն Ուբեղ Մոնիեն նախ շնորհակալություն հայտնեց մարզպետին ջերմ ընդունելության համար, այնուհետև ընդգծեց, որ ինքը ևս համաձայն է նրա հետ, որ իրենց համար ևս կարևոր է փորձի փոխանակումն ու գիտելիքների ու աշխատանքների մեթոդների մասին երկուստեք քննարկումը: <Հարգելի պարոն Ցոլակյան ես ուրախ եմ, որ Դուք բժիշկ չլինելով կարևերում եք այս ոլորտում խնդիրների հապշտապ լուծումը, տեղեկացված եք դրանց մասին, իսկ դա այնքան կարևոր պայման է: Ես ևս կողմ եմ փոխադարձ այցելություններին ու շփումների ակտիվացմանը>,-ասաց Ուբեղ Մոնիեն:
Այնուհետև կողմերն անդրադարձան հոգեբուժության բնագավառում առկա հիմնախնդիրներին, հատկապես կարևորելով մանկական հոգեբուժությանը, մանկական հոգեբանների վերապատրաստումը, քանզի այժմ Գյումրիում այսպիսի մասնագետներ չկան:
