Նորություններ
Կրկին կարկտահարություն, կրկին մեծ վնասներ
29.07.2014
Շիրակի մարզում հուլիսի 26-ի կարկտահարության հետևանքով տուժել է թվով 8 համայնքների ցանքատարածքներ: Այսօր Շիրակի մարզպետ Ֆելիքս Ցոլակյանն ու գյուղատնտեսության փոխնախարար Սամվել Գալստյանը այցելեցին կարկտահարված համայնքներ, հանդիպեցին գյուղացիների հետ, եղան ցանքատարածքներում:
Ողջի գյուղի սահմանային ուղեկալի հատվածում գտնվող ցանքատարածքներում վնասի չափն հասնում էր գրեթե 100 տոկոսի: Լուրջ վնասներ էին կրել նաև Բյուրակնի ու Մեղրաշատի ցանքատարածքները:
Ընդհանուր առմամբ այս տարի Շիրակի մարզում կարկտահարությունից վնասներ են կրել 31 համայանքներ, նրանցից մի քանիսում կրկնակի կարկտահարություն է արձանագրվել: Ըստ նախնական տվյալների վնասվել է 12500հա ցանքատարածք, որից 10250հա-ը հացահատիկային մշակաբույսերինն է, հազար հա-ից ավելի` կարտոֆիլինը, մնացածը` բանջարեղենը:
Շիրակի մարզպետ Ֆելիքս Ցոլակյանը բնակիչների հետ զրույցում նշեց, որ կառավարությունում այս ամենի մասին տեղյակ են ու արդեն իսկ քայլեր են ձեռնարկվում այդ ուղղությամբ:
<2014թվականին կառավարության որոշմամբ գյուղացիական տնտեսություններից չի պահանջվի տրամադրված սերմացուի գումարը, դա արդեն իսկ քիչ բան չէ, մոտ 1100 տոննա նախորդ և շուրջ 800 տոննա այս տարվա սերմացուն, քայլեր են ձեռնարկվում նաև վարկերի երկարաձգման առումով>,-ասաց Ֆելիքս Ցոլակյանը: Շիրակի մարզպետը նշեց նաև, որ ևս մեկ ծրագիր է իրականացվելու կարկուտից տուժված համայնքներում սոցապնախարարության կողմից: Ըստ պարոն Ցոլակյանի խոսքը <Վարձատրվող հասարակական աշխատանք> ծրագրի մասին է, որով շուրջ 100մլն դրամ գումար կուղղվի Շիրակի մարզ:
<Մենք այսօր ծանոթացանք այս համայնքների ցանքատարածքների վիճակին, բնականաբար ամեն ինչ անելու ենք, որ այս համայնքները ևս օգտվեն այն արտոնություններից, ինչ մինչ այժմ կարկտահարված համայնքների դեպքում է: Սա մարզում հինգերորդ մեծամասշտաբ կարկտահարությունն է, ինչն իսկապես ցվալի է: Ես հուսով եմ` սա վերջին դեպքն է լինելու և Շիրակիմարզի գյուղացիական տնտեսությունները կհասցնեն բերքահավաք կազմակերպել>,-լրագրողների հետ զրույցում ասաց Ֆելիքս Ցոլակյանը: