Շիրակի մարզպետի աշխատակազմ

Սեպտեմբերի 11-ին Շիրակի մարզի Անիի նախկին տարածքշրջանի Ձիթհանքովի համայնքում իսկական տոնախմբություն էր, վերաօծվում էր գյուղի 1889 թվականից չգործող Սրբ. Աստվածածին եկեղեցին: Մոսկվայում բնակվող և աշխատող Ձիթհանքով գյուղի բնակիչ Ռոստոմ Ստեփանյանի շուրջ 50հազար ԱՄՆ դոլար ֆինանսական աջակցության շնորհիվ, համայքի ղեկավար Հովիկ Պողոսյանի ջանքերով հիմնովին վերանորոգվել և կահավորվել է գյուղի 1883 թվականին կառուցված Սրբ. Աստվածածին եկեղեցին, որը գործել է մինչև 1889 թվականը: Չնայած անցած բոլոր տարիներին եկեղեցին ծառայել է որպես աղոթատեղի, սակայն, որպես եկեղեցի չի գործել, քանի որ գտնվել է քանդված, անմխիթար վիճակում: Երիտասարդ գործարարի բարեգործական ակցիան ուներ մեկ այլ խորհուրդ ևս, եկեղեցու վերաօծման արարողությունը համընկավ  բարերարի հոր ծննդյան տարելիցին, որը բարերարի նվերն էր իր ծնողին ծննդյան օրվա կապակցությամբ: Տոնական միջոցառմանը մասնակցում էին Շիրակի մարզպետ Ֆելիքս Ցոլակյանը, Շիրակի թեմի առաջնորդ Միքայել եպիսկոպոս Աջապահյանը, բարերարի ողջ գերդաստանը, Անիի նախկին տարածաշրջանի համայնքների ղեկավարներ, ԶԼՄ ներկայացուցիչներ, հյուրեր ՌԴ-ից: Միջոցառման կապակցությամբ շնորհավորեցին և ելույթներ ունեցան համայնքի ղեկավար Հովիկ Պողոսյանը, Շիրակի մարզպետ Ֆելիքս Ցոլակյանը, բարերարի ազգականուհին: Բարերարը ելույթ չունեցավ, խոստումներ ևս չտվեց, բայց համոզված ասած, որ գյուղում դեռ անելիքներ կան: Ելույթներից հետո Շիրակի թեմի առաջնորդ Միքայել եպիսկոպոս Աջապահյանն անցավ վերաօծման արարողությանը, որից հետո վերաօծված խաչը կրկին իր տեղը զբաղեցրեց եկեղեցու գմբեթաձև տանիքին: Ուրախ տարամադրությունը շարունակվեց համայնքի ակումբում, ուր եկեղեցու վերաօծման պատվին տրվեց Սրբ Մատաղ: