Պաշտոնական էլ. փոստ
(միայն www.e-citizen.am համակարգով ծանուցումների համար)
Տպել
Նորություններ
Փարիզի օստեոպատները Գյումրու ,,Սամարիթեր,, հիվանդանոցում
28.07.2015
Հուլիսի 28-ին Փարիզի օստեոպատների Echosteo ասոցիացիայի բժիշկներն ավարտեցին իրենց բարեգործական ծրագիրը Գյումրիում: Քաղաքի «Սամարիթեր» վերականգնողական կենտրոնի հրավերով, կենտրոնում, շուրջ մեկ ամիս անվճար բուժզննում, խորհրդատվություն ու օստեոպատիկ միջամտություն էին իրականացնում ֆրանսիացի մասնագետները: Ինչպես տեղեկացրեց «Սամարիթեր» վերականգնողական կենտրոնի վերականգնողական թերապիայի բաժնի վարիչ, բժիշկռեաբիլիտոլոգ Հասմիկ Պետրոսյանը, ֆրանսիացի մասնագետների խումբը մոտ երկու ամիս՝ շաբաթական երկու օր աշխատել է կենտրոնում՝ տարբեր խմբերով: «Նրանց հիմնականում դիմել են ողնաշարի խնդիրներ ունեցող՝ օստրեոխոնդրոզներ, միջողային սկավառկների ճողվածքներ, խոշոր հոդերի, մկանային խնդիրներ ունեցող և ցավային սինդրոմով հիվանդները: Միայն միջողային ճողվածքներով հիվանդները բավական մեծ թիվ են կազմել», նշեց մասնագետը: Ի դեպ, այս ընթացքում ֆրանսիացի մասնագետների մոտ գրանցվել է մոտ 800 այցելություն, նրանցից 300ը՝ կրկնակի ընդունելությամբ: Ինչպես հայ, այնպես էլ ֆրանսիացի մասնագետը նման թիվը կապում են ծանր աշխատանքի, դժվար կենսակերպի և բժիշկին ուշ դիմելու հետ: «Եկած հիվանդների մեծամասնությունը ժամանակին բժիշկներին դիմելու և հետազոտվելու հնարավորություն չէր ունեցել, և այնքան էին նրանց խնդիրները բարդացել, որ ստիպված էին եկել: Բավական արհեստավարժ թիմ էր, իրենց գործը լավ գիտեին և այս ընթացքում սովորեցինք որոշակի մարտավարական հնարքներ, որոնք կտան հիվանդի «ցավը հանելու» հնարավորություն», հավելեց Հասմիկ Պետրոսյանը: Այն մասին, որ երիտասարդ բժիշկների աշխատանքը բավական արդյունավետ էր, խոսում էր վերջին օրվա հոսքը՝ այցելուններից շատերը եկել էին կրկին շնորհակալություն հայտնելու: Օստեոպատիան կամ մանուալ թերապիան արագ և արդյունավետ վերականգնում է հենաշարժողական ապարատի գործունեությունը: Հայաստանում այս մեթոդը շատ տարածված չէ, և շատ կլինիակներում այն չի կիրառվում, մինչդեռ, արտասահմանյան շատ երկրներում բավական լայն տարածում ունի: «Սա բավական երիտասարդ ասոցիացիա է: Առաջին անգամ էինք Գյումրիում՝ կենտրոնի նախկին տնօրեն, բժիշկ Ռաֆիկ Խաչատրյանի հրավերով: Ի տարբերություն Հայաստանի, Ֆրանսիայում այս մեթոդը բավական լայն տարածում ունի, և շատ կլինիկաներում կան հատուկ կաբինետներ: Հինգ տարի է անհրաժեշտ որպես օստրեոպատ վերապատրաստվելու համար, բայց արդյունքն արդարացված է, երբ տեսնում ես, որ օգնել ես մարդուն ու մեղմել նրա ցավը» նշեց «Էկո» օստեոպատների ասոցիացիայի խորհրդի անդամ, խմբի համաղեկավար Ջուլիե Նիկոլան՝ իր և խմբի մյուս անդամների անունից շնորհակալություն հայտնելով գյումրեցի մասնագետներին՝ համագործակցության համար՝ հույս հայտնելով, որ հաջորդ տարի ևս խումբը կայցելի Գյումրի: Ֆրանսիայի օստեոպատների Echosteo ասոցիացիայի մասնագետների նպատակն է առաջիկայում Հայաստանում օստեոպատների դպրոց հիմնելը: Ավելացնենք, որ կատարված աշխատանքի համար ասոցիացիայի խորհրդի անդամներ, խմբի համաղեկավարներ Սամուել Հաջակյանն և Ջուլիե Նիկոլան արժանացան Շիրակի մարզպետի շնորհակալագրերին:
Արմենուհի Մխոյան
