Շիրակի մարզպետի աշխատակազմ

«Մաքուր Հայաստան» ծրագրի շրջանակներում իրականացված 2018 թվականի առաջին համապետական շաբաթօրյակին մասնակցեցին Շիրակի մարզի բոլոր համայնքները` 18 հազար մասնակից, 256 կոլեկտիվ և 298 աշխատանքային տեղամասեր: Շաբաթօրյակին մասնակցեցին գործող կազմակերպությունները, դպրոցները, նախակրթարանները, մշակութային օջախներն ու հասարակական սեկտորը, բնակիչներն ու մասնավոր կառույցները:
Շիրակի մարզպետարանի աշխատակազմը աշխատանքներ իրականացրեց Գյումրի-Երևան մայրուղու դեպի Ազատան տանող ճանապարհամերձ հատվածում. «Այս շաբաթօրյակին աշխատանքներն հատկապես իրականացնելու ենք պատմաճարտարապետական հուշարձանների տարածքներում, ճանապարհամերձ հատվածներում, հանգստյան և զբոսաշրջային գոտիներին մերձակա տարածքներում` հաշվի առնելով առաջիկայում համապետական լայնամասշտաբ միջոցառումները, ինչը ենթադրում է, որ հյուրեր կայցելելն հանրապետություն և մենք խնդիր ունենք մեր երկիրը ներկայացնելու: Այսօր մաքրման աշխատանքներ կիրականացվեն Երերույքի տաճարի, Հառիճավանքի, Մարմաշենի վանական համալիրի տարածքներում»,- լրագրողների հետ զրույցում նշեց Շիրակի մարզպետի տեղակալ Սեյրան Պետրոսյանը: Մարզպետի տեղակալը կարևորեց մարդկանց վերաբերմունքի փոփոխությունը, շրջակա միջավայրի նկատմամբ հոգատար վերաբերմունքը. «Մենք ասում ենք, որ հազարամյա պատմություն ունենք, մեր բազմադարյա մշակույթը մեր քայլերով ևս պետք է ապացուցենք, պետք է սիրենք բնությունն ու պահպանենք այն, ցավոք, այժմ նման հոգատարություն չենք տեսնում: Դրա համար այսօրինակ միջոցառումները դարձրել ենք ավանդական, որպեսզի քայլ-քայլ դրական տեղաշարժ ունենանք»:
Նշենք, որ մարզում շաբաթօրյակին կենտրոնացվել էր 72 ինքնաթափ, 11բարձիչ մեխանիզմ, 4 էքսկավատոր: Համայնքներում իրականացվող մաքրման աշխատանքների ընթացքը վերահսկում էին Շիրակի մարզպետարանի պատասխանատու աշխատակիցները: Առանձնակի ուշադրություն էր դարձվել նաև աղբավայրերի փակմանը, այս շաբաթօրյակին նախատեսվում է փակել 8 գործող և 2 չգործող աղբավայրեր: