Նորություններ
Շիրակի մարզ է այցելել ՀՀ տարածքային կառավարման և զարգացման նախարարի տեղակալ Հակոբ Սիմիդյանը
26.10.2018
Հոկտեմբերի 26-ին Շիրակի մարզ է այցելել ՀՀ տարածքային կառավարման և զարգացման նախարարի տեղակալ Հակոբ Սիմիդյանը։ Շիրակի մարզպետարանում նախարարի տեղակալի, Շիրակի մարզպետ Կարեն Սարուխանյանի, մարզային իշխանության ներկայացուցիչների և Գյումրու քաղաքապետի մասնակցությամբ անցկացվել է աշխատանքային խորհրդակցություն։ Խորհրդակցության ժամանակ քննարկվել են «Գյումրու քաղաքային ճանապարհներ» ծրագրի իրականացմանն առնչվող հարցեր։ Պատասխանատուները կարևորել են ճանապարհաշինական աշխատանքների հնարավորինս արագ իրականացումը՝ ընդգծելով դրանցում թերացումների ու անորակության բացառումը։ Հաշվի առնելով բնակիչների բողոքներն ու նրանց համար ստեղծված անհարմարությունները, ինչպես նախարարի տեղակալն, այնպես էլ Շիրակի մարզպետը հորդորել են Գյումրու քաղաքապետ Սամվել Բալասանյանին առավել հետևողականություն ցուցաբերել և հետևել, որպեսզի 2018 թվականի համար պլանավորած աշխատանքների ծավալներն ապահովվեն։ Պայմանավորվածություն է ձեռք բերվել հանդիպումներն ու քննարկումները շարունակական դարձնել և ամեն ինչ անել փողոցաշինական աշխատանքների նորմալ ընթացքն ապահովելու առնչությամբ։