Պաշտոնական էլ. փոստ
(միայն www.e-citizen.am համակարգով ծանուցումների համար)
Նորություններ
Շիրակի նորանշանակ մարզպետը մարզպետարանի պատասխանատուների հետ անցկացրել է աշխատանքային առաջին հանդիպումը
07.02.2019
Շիրակի նորանշանակ մարզպետը փետրվարի 7-ին մարզպետարանի պատասխանատուների հետ անցկացրել է աշխատանքային առաջին հանդիպումը: Տիգրան Պետրոսյանը ծանոթացել է պատասխանատու վարչությունների, բաժինների ղեկավարներին և նրանց գործունեությանն առնչվող հարցերին:
«Ինձ պատիվ ու պատասխանատվություն է ընձեռվել ղեկավարելու իմ մարզը: Ինձ համար աշխատանքը համագործակցությունն է: Աշխատանքային մոտեցումների ու առաջնահերթությունների հստակեցումը պետք է անենք հիմնվելով մեր մարզի առջև ծառացած հիմնահարցերի լուծման տեսանկյունից: Դուք, կարծում եմ, լսել եք ՀՀ վարչապետի խոսքը. գործադիրի ղեկավարը կարևորեց մարզերում բիզնես միջավայրի բարելավումն ու նոր ներդրումների ներգրավումը, սոցիալ-տնտեսական վիճակի հիմնահարցերի լուծմանն ուղղված քայլերի ձեռնակրումը: Մենք բոլորս էլ հասկանում ենք, որ Շիրակի մարզն այս առումով տասնամյակների չլուծված խնդիրներ ունի, դրանց լուծմանը պետք է միտված լինի մեր գործունեությունը»,- աշխատակիցների հետ զրույցում նշել է Շիրակի մարզպետը:
Քննարկման ընթացքում անդրադարձ է եղել առաջիկա օրերին անհետաձգելի հանդիպումներին ու անելիքներին: Տիգրան Պետրոսյանը վստահեցրել է, որ մարզպետի աշխատանքն աշխատակազմի հետ լինելու է մաքսիմալ պատասխանատու, գործընկերային ու թափանցիկ:
