Նորություններ
Տեղի ունեցավ հանրային հաշվետվողականության հարթակի առաջին քննարկումը
21.03.2019
Մարտի 21-ին Շիրակի մարզպետարանում տեղի ունեցավ Շիրակի մարզպետ Տիգրան Պետրոսյանի նախաձեռնությամբ ստեղծված հանրային հաշվետվողականության հարթակի առաջին քննարկումը, որը վերաբերում էր ճանապարհաշինության հիմնահարցերին: Քննարկմանը մասնակցեցին Շիրակի մարզպետարանի և քաղաքային համայնքների ոլորտային պատասխանատուները, «Հյուսիս-հարավ» ծրագրի Շիրակի մարզում աշխատանքների իրականացման պատասխանատու «Սինոհիդրո» ընկերության փոխմենեջեր Լյու Մին Տյուն, մարզի ճանապարհները սպասարկող, ինչպես նաև Գյումրու ճանապարհաշինական աշխատանքներն իրականացնող կապալառու կազմակերպությունների տնօրենները:
Շիրակի մարզպետարանի քաղաքաշինության վարչության պետ Ալբերտ Մարգարյանը նախապես ներկայացրել է մարզում ճանապարհաշինության բնագավառում 2019 թվականին իրականացվելիք աշխատանքների մասին ամփոփ տեղեկատվություն: Ըստ այդմ 2019 թվականին նախատեսվում է շուրջ 11 մլրդ դրամի շինմոնտաժային աշխատանքներ: Ծավալվել է շահագրգիռ քննարկում հանդիպմանը մասնակցող քաղհասարակության ու զանգվածային լրատվության ներկայացուցիչների, շահագրգիռ քաղաքացիների ու պատասխանատուների միջև: