Շիրակի մարզպետի աշխատակազմ

Այսօր ՀՀ Շիրակի մարզպետարանում տեղի է ունեցել հանրային հաշվետվողականության հարթակի հերթական քննարկումը, որը նվիրված էր մարզի կարևորագույն խնդիրներից մեկին՝ գործազրկությանը: Քննարկմանը ներկա են եղել Շիրակի մարզպետ Տիգրան Պետրոսյանը, Շիրակի մարզպետարանի ոլորտային պատասխանատուները, զբաղվածության և սոցիալական ծառայությունների տարածքային կենտրոնների ղեկավարներ, ԲՈՒՀ-երի ավարտական կուրսերի ուսանողներ, աշխատանք փնտրող քաղաքացիներ, ՀԿ-ների և զանգվածային լրատվության միջոցների ներկայացուցիչներ:
Շիրակի մարզպետ Տիգրան Պետրոսյանը ողջունել է մասնակիցներին, շնորհակալություն հայտնել քննարկմանը մասնակցելու համար: Տիգրան Պետրոսյանը նշել է, որ մեր մարզում իսկապես գործազրկությունն առանձնակի ուշադրություն պահանջող հիմնահարցերից է. «Շիրակի մարզն, ի թիվս այլ աղետների, տեսել է նաև գործազրկություն անունը կրող սոցիալական աղետը և մենք բոլորս պետք է ամեն ինչ անենք, որպեսզի ազատվենք աղետի թողած հետևանքներից: Դա պետք է արվի աշխատանքի շնորհիվ, որը բոլորիս իրավունքն է: Նմանատիպ քննարկումներն էլ կարևորում եմ նրանով, որ հնարավորություն են ընձեռում պետական կառավարման համակարգի բացերի մասին լսել և հնարավորինս շտկել»,- նշել է Տիգրան Պետրոսյանը:
Գործազրկության ցուցանիշներով առաջին հորիզոնականը զբաղեցնող մարզի հիմնախնդիրների, զբաղվածության տարածքային կենտրոնների գործազրկության հաղթահարմանն ուղղված պետական ծրագրերի, առաջիկա անելիքների ու մտահոգությունների մասին է խոսել Գյումրու զբաղվածության տարածքային կենտրոնի տնօրեն Ամալյա Ադամյանը:
Քննարկման ընթացքում բարձրացվել են մի շարք հարցեր, որոնք վերաբերել են մարզում գրանցված գործազրկության թվին, աշխատանք փնտրող անձանց հաշվառման կարգին, աշխատաշուկայի պահանջներին , որոնց տրվել են պատասխաններ: