Նորություններ
«Մնա տանը-եղիր առողջ»
11.08.2020
Այսօր ՀՀ Շիրակի մարզպետ Տիգրան Պետրոսյանը հյուրընկալել և հուշանվերներ է հանձնել «Մնա տանը-եղիր առողջ» խորագրով ֆիզկուլտուրայի վարժությունների տեսաձայնագրությունների հանրապետական մրցույթում Շիրակի մարզը ներկայացրած և հանրապետական մրցույթի գնահատող հանձնախմբի անդամների բարձր գնահատականին արժանացած մասնակիցներին։
Շիրակի մարզպետը ողջունել է մասնակիցներին՝ կարևորելով ֆիզիկական կուլտուրայի դերն ու նշանակությունը աշակերտների ֆիզիկական դաստիարակության գործում։
Համավարակով պայմանավորված՝ աշակերտների շրջանում ֆիզիկական կուլտուրան և ֆիզիկական դաստիարակությունը հնարավորինս խթանելու նպատակով 2019–2020 ուսումնական տարվա վերջին ՀՀ կրթության, գիտության, մշակույթի և սպորտի նախարարությունը նախաձեռնել էր «Մնա տանը-եղիր առողջ» խորագրով ֆիզկուլտուրային վարժությունների տեսաձայնագրությունների հանրապետական մրցույթը։ Մինչև 3 րոպե տևողությամբ տեսաձայնագրություններն ուղեկցվել են երաժշտությամբ և համալիր վարժությունների համադրությամբ։ Միջոցառման Շիրակի մարզային փուլին մասնակցության համար հանրակրթական դպրոցների կողմից ներկայացվել են 37 հոլովակներ։ Միջոցառման մարզային փուլում լավագույնները ճանաչված երեք տեսաձայնագրություններն արժանացել են նաև ՀՀ կրթության, գիտության, մշակույթի և սպորտի նախարարության կողմից սահմանված շնորհակալագրերին։