Շիրակի մարզպետի աշխատակազմ

Շիրակի մարզպետ Նազելի Բաղդասարյանի ուղեկցությամբ «Քաղաքացիական պայմանագիր» խմբակցության պատգամավորներն այցելել են Աշոցք համայնքի Կոճոռ թաղամաս, հանդիպել` բնակիչներին։ Թաղամասը կառուցվել է 1988-1991 թվականներին։ Տարիների ընթացքում իրար միացվելուց կամ ապամոնտաժվելուց հետո փայտյա շենքերի բնակարանների քանակը 164 է, գտնվում են վատթար վիճակում։ Խնդրի լուծման ուղղությամբ կառավարությունն արդեն քայլեր է ձեռնարկում։
Այցի շրջանակներում հանդիպում է եղել Աշոցքի համայնքապետարանում, քննարկվել են համայնքի հիմնախնդիրներին վերաբերող հարցեր։
«Քաղաքացիական պայմանագիր» խմբակցության պատգամավորների մի խումբն էլ` մարզպետի տեղակալներ Կարեն Մանուկյանի և Ալբերտ Այվազյանի հետ այցելել է Արթիկ համայնք։ Համայնքի ղեկավար Անան Ոսկանյանի ուղեկցությամբ եղել են Արթիկի թիվ 1 դպրոցում, որի տանիքը 620 ք/մ մակերեսով վնասվել է ուժեղ քամու պատճառով։ Նախագծա-նախահաշվային փաստաթղթերը պատրաստ են, կառավարությունը շուտով համապատասխան միջոցների հատկացում կանի շինաշխատանքներն իրականացնելու համար։
Պատվիրակությունը եղել է նաև Արթիկի թիվ 2 դպրոցում, որի շինարարությունը մեկնարկել է։ Ծրագրի պատվիրատու է հանդիսանում Հայաստանի տարածքային զարգացման հիմնադրամը: Ընդհանուր արժեքը 1 մլրդ 521 մլն դրամ է։
Այցելությունն ավարտվել է Արթիկի համայնքապետարանում անցկացված խորհրդակցությամբ։