Շիրակի մարզպետի աշխատակազմ

 Շիրակի մարզպետ Մուշեղ Մուրադյանը ՀՀ ՊՆ Վազգեն Սարգսյանի անվան ռազմական համալսարանի պետ, գնդապետ Արթուր Երոյանի, ՀՀ պաշտպանության նախարարի օգնական Հարություն Մաթևոսյանի, մարզային իշխանության ներկայացուցիչների հետ հանդիպում է ունեցել մարզի խոշորացված համայնքների ղեկավարների, ավագ և միջնակարգ դպրոցների տնօրենների և զինղեկների հետ։
Հանդիպման մեկնարկին ներկաները մեկ րոպե լռությամբ հարգել են հանուն հայրենիքի ընկած հերոսների հիշատակը։
Ողջունելով հանդիպման մասնակիցներին՝ Շիրակի մարզպետն անդրադարձել է ռազմական կրթության կարևորությանն ու դպրոցներում՝ ռազմական համալսարանում ուսանելու առավելությունների մասին տեղեկատվությունը առավել մատչելի ներկայացնելուն․ «ՀՀ կառավարության կողմից այսօր շատ լուրջ բարեփոխումներ են իրականացվում՝ ի նպաստ մեր զինված ուժերի, որից հետ չի մնում նաև ռազմական համալսարանը։ Մեր մատաղ սերնդի դաստիարակության մեջ հայրեասիրություն սերմանելու գործում մեծ է դպրոցների առաքելությունը։ Հայրենիքի համար պիտանի և հայրենանվեր քաղաքացի ձևավորվում է հենց դպրոցից սկած։ Բոլորս անելիք ունենք այս ճանապարհին, քանզի մենք պետք է ուժեղ լինենք ու միշտ պատրաստ մեր երկիրը պաշտպանելու»։
Վազգեն Սարգսյանի անվան ռազմական համալսարանի պետ, գնդապետ Արթուր Երոյանը ներկայացրել է ռազմական համալսարանում իրականացվող բարեփոխումները, նոր ծրագրերի ներդրումը, ինչպես նաև համալսարանում ուսանելու ընթացքում և հետագայում շրջանավարտների համար նախատեսվող առավելությունները՝ նշելով, որ հանդիպման նպատակը դպրոցականների շրջանում մասնագիտության նկատմամբ հետաքրքրության խթանումն է։
Պայմանավորվածություն է ձեռքբերվել աշակերտների համար առաջիկայում ճանաչողական այցեր և հանդիպումներ կազմակերպել։