Պաշտոնական էլ. փոստ
(միայն www.e-citizen.am համակարգով ծանուցումների համար)
Նորություններ
ՀՀ ՇԻՐԱԿԻ ՄԱՐԶՊԵՏ ՄՈՒՇԵՂ ՄՈՒՐԱԴՅԱՆԻ ՈՒՂԵՐՁԸ ՀԱՆՐԱՊԵՏՈՒԹՅԱՆ ՏՈՆԻ ԱՌԹԻՎ
28.05.2023
Հարգելի՛ հայրենակիցներ,
Շնորհավորում եմ բոլորիս Հանրապետության տոնի առթիվ:
Այսօրվա անկախ Հայաստանի գոյությամբ մենք պարտական ենք 1918 թվականի Բաշ-Ապարանի, Սարդարապատի, Ղարաքիլիսայի, Սոգըթլուի հերոսամարտերին, որոնց արդյունքում հռչակվեց Հայաստանի առաջին Հանրապետությունը։ Դարեր շարունակ օտարի լծի տակ լինելով՝ հայ ժողովուրդը ամուր կամքի շնորհիվ նվաճեց այդ հաղթանակը։ Այն կարևոր էր մի քանի նկատառումով՝ երկար սպասված էր, հայոց ցեղասպանության վերքերը դեռ թարմ էին հայերի սրտերում, մի ժամանակաշրջան էր, երբ նման հաղթանակն անհավանական էր թվում։ Այնուամենայնիվ, հայը կարողացավ անձնազոհ հայորդիների միասնականության շնորհիվ հասնել բաղձալիին։
Հավերժ փառք նրանց ու բոլոր ժամանակներում մեր սուրբ հողի համար ընկած հայ քաջորդիներին։
Անցած դարասկզբին հաղթանակներ կերտած մեր հայրենակիցների սխրանքով պետք է առաջնորդվենք այսօր, քանի որ գրեթե նույն փորձությունների հորձանուտում է հայտնվել մեր պետությունը։
Հիմա, առավել քան երբևէ, միասնական լինելու անհրաժեշտություն կա։
Համոզված եմ` համատեղ ուժերով, համախմբվածության, համառ ջանքերի արդյունքում ունենալու ենք խաղաղ արշալույսներ ու մարտահրավերների դեմ ամուր կանգնած երկիր։
Շնորհավոր մայիսի 28։
