Շիրակի մարզպետի աշխատակազմ

 Շիրակի մարզպետ Մուշեղ Մուրադյանն աշխատակազմի պատասխանատուների հետ այսօր այցելել է Գյումրու «Տավրոս» կոշիկի ֆաբրիկա։ Ընկերության հիմնադիր Արտակ Մովսիսյանի ուղեկցությամբ մարզպետը շրջել է ֆաբրիկայում, ծանոթացել աշխատանքների ընթացքին, զրուցել աշխատակիցների հետ, հետաքրքրվել արտադրության ծավալներով, ձեռքբերումներով, առաջիկա անելիքներով և խնդիրներով:
Հիմնադիրը Մուշեղ Մուրադյանին տեղեկացրել է, որ այժմ արտադրում են հատուկ նշանակության կոշիկներ, որոնք արտահանվում են Ռուսաստանի Դաշնություն։ Այժմ միայն արտաքին շուկայի պատվերներ են կատարում։ Անդրադարձ է կատարվել փորձառու աշխատուժի ներգրավման ու նոր մասնագետներ պատրաստելու խնդրին։ Մարզպետը կարևորել է տեղի արտադրության կազմակերպումն ու ծավալների ընդլայնումը՝ ընդգծելով մարզում նոր աշխատատեղերի ստեղծման անհրաժեշտությունը։