Շիրակի մարզպետի աշխատակազմ

 Այսօր տեղի է ունեցել Շիրակի մարզի խորհրդի 2023 թվականի հերթական նիստը, համայնքների ղեկավարներից զատ նիստին մասնակցել են ուժային կառույցների, առողջապահական հաստատությունների ղեկավարներ։
Մարզխորհրդի նիստի մեկնարկին Շիրակի մարզպետ Մուշեղ Մուրադյանն անդրադարձել է տեղի ունեցած կադրային փոփոխություններին՝ նշելով, որ Շիրակի մարզպետի աշխատակազմում իրականացվել է վերակազմակերպման և կառուցվածքային փոփոխության գործընթաց, համաձայն որի 14 կառուցվածքային ստորաբաժանումները միաձուլվել և անվանափոխվել են, ինչի արդյունքում ստեղծվել են նոր 10 կառուցվածքային ստորաբաժանումներ՝ 7 վարչություններ և 3 բաժիններ, բոլոր աշխատակիցները վերանշանակվել են նոր պաշտոնների:
Մարզխորհրդի օրակարգային առաջին հարցը վերաբերվել է մարզի համայնքների բյուջեների սեփական եկամուտների 2023 թվականի 1-ին կիսամյակի կատարմանը, որը զեկուցել է աշխատակազմի ֆինանսական վարչության պետ Լիպարիտ Մարտիրոսյանը։
Ըստ այդմ, հունիսի 30-ի դրությամբ համայնքների բյուջեների սեփական եկամուտները կատարվել է 95.5 տոկոսով, հողի և գույքի վարձակալության գումարները գանձվել են 80․9 տոկոսով, փոխադրամիջոցներից գույքահարկը՝ 92․2։
Մարզպետն անդրադառնալով սեփական եկամուտների կատարողականին՝ ընդգծել է, որ այս հարցում առավել խիստ է լինելու և որևէ թերացում չի ընդունելու․ «Առիթ ունեցել եմ ասելու՝ կրկնվեմ՝ սեփական եկամուտների հավաքագրումը համայնքների ղեկավարների ուղիղ պարտականությունն է և թերացումը նախ նշանակում է աշխատանքում թերանալ և, բնականաբար, համայնքներում նախանշված ծրագրերի ընթացքի դանդաղեցում։ Դրա համար ևս մեկ անգամ բոլորիդ հորդորում եմ՝ եղեք առավել նախաձեռնողական ու զգոն»։
Մարզի համայնքներից սեփական եկամուտներն ամենաբարձրը կատարել է Արթիկը՝ 100․7 տոկոս, Գյումրին՝ 97․2, ամենացածրը սեփական եկամուտները կատարել է Անի համայնքը՝ 68․9 տոկոս, չնայած որ նախորդ տարվա նույն ժամանակահատվածի համեմատ 10 տոկոսի աճ է գրանցվել։
Քաղաքաշինության, հողաշինության և ենթակառուցվածքների կառավարման վարչության պետ Խաչատուր Խնձրցյանն անդրադարձել է 2023 թվականի ընթացքում մարզում նախատեսված կապիտալ շինարարության ծրագրերին: 2023 թվականին նախատեսվում է շուրջ 23 մլրդ 335 մլն դրամ գումարի կապիտալ ներդրում՝ տարեսկզբի համեմատությամբ 1 մլրդ 235 մլն-ով ավելի։ 13 մլրդ 500 մլն դրամ գումար կուղղվի ճանապարհաշինությանը, 3 մլրդ 600 մլն դրամ բնակարանաշինության։
Օրակարգային հաջորդ հարցը վերաբերվել է 2023 թվականի տնտեսական և սոցիալական ենթակառուցվածքների զարգացմանն ուղղված սուբվենցիոն ծրագրերի ընթացքին և 2024 թվականի համար ներկայացված հայտերին։ Մարզպետի աշխատակազմի զարգացման ծրագրերի մշակման և իրականացման բաժնի պետ Կարեն Բադիշյանի զեկույցի համաձայն, ՀՀ տարածքային կառավարման և ենթակառուցվածքների նախարարություն է ներկայացվել 32 տնտեսական և սոցիալական ենթակառուցվածքների զարգացմանն ուղղված սուբվենցիոն ծրագրի ամբողջական փաթեթ՝ 130 ենթածրագրերով, որից հաստատվել է 27 ծրագիր 108 ենթածրագրերով։Ծրագրերի ընդհանուր նախահաշվային գումարը կազմել է 7 մլրդ 568 մլն դրամ, որից ՀՀ պետական բյուջեից համաֆինանսավորման չափաբաժինը՝ 3 մլրդ 937 մլն դրամ (52%), համայնքի բյուջեի ֆոնդային մասը՝ 3 մլրդ 542 մլն դրամ (46.8%) և այլ ներդրողներ 89 մլն դրամ (1.2%)։
«Պետություն-համայնք համագործակցությունն իրապես ստացվել է սուբվենցիոն ծրագրերի շնորհիվ, մնում է ձեզ, համայնքների հարգելի ղեկավարներ, լինել առավել ուշադիր, նախաձեռնող, որպեսզի ավելի շատ ծրագրեր իրականացվեն և ավելի շատ լինի բնակավայրերի ընդգրկվածությունը»։
Նշենք, որ 2024 թվականի համար ՀՀ տարածքային կառավարման և ենթակառուցվածքների նախարարություն է ներկայացվել 41 տնտեսական և սոցիալական ենթակառուցվածքների զարգացմանն ուղղված սուբվենցիոն ծրագրային հայտեր՝ 188 ենթածրագրերով։ Ծրագրերի ընդհանուր արժեքը կազմում է 13 մլրդ 855 մլն դրամ, որից ՀՀ պետական բյուջեից համաֆինանսավորման չափաբաժինը կազմել 7 մլրդ 238 մլն դրամ (52%)։
Տարածքային կառավարման և տեղական ինքնակառավարման հարցերի վարչության պետ Արամ Անտոնյանի զեկույցն առնչվել է մարզի տեղական ինքնակառավարման մարմինների լիազորություններին վերաբերող առանձին հարցերի և իրականացված աշխատանքներին։ Անդրադարձ է կատարվել համայնքներում առկա, համայնքի սեփականություն համարվող, սակայն մինչև օրս պետական գրանցում չստացած գույքի և մեքենասարքավորումների պատշաճ հաշվառմանն ու գրացմանը, համայնքների կողմից վարվող համացանցային կայքերում առկա տեղեկատվության որակին և օպերատիվությանը, համայնքներ ուղարկված գրություններին սահմանված ժամկետում պատասխանելուն։
Օրակարգային հաջորդ հարցը գյուղատնտեսական աշխատանքների և ոռոգման կազմակերպման ընթացքին է վերաբերվել, ըստ գյուղատնտեսության և շրջակա միջավայրի պահպանության վարչության պետ Ռոման Համայակյանի զեկույցի ոռոգման շրջանում լուրջ խնդիրներ չեն առաջացել, իսկ բերքի տակ կատարվել է շուրջ 17455 հա աշնանացան ցորենի ցանք, որը նախորդ տարվանից ավելի է 4783 հա-ով: Աշնանացան ցորենի ցանքատարածության աճին նպաստել է ՀՀ էկոնոմիկայի նախարարության կողմից իրականացվող «Հայաստանի Հանրապետությունում աշնանացան ցորենի արտադրության խթանման 2022 թվականի պետական աջակցության» ծրագիրը։
2023 թվականի առաջին կիսամյակում մարզի առողջապահության ոլորտում կատարված աշխատանքների մասին էլ զեկուցել է առողջապահության և սոցիալական ոլորտի հարցերի վարչության պետի պարտականությունները կատարող Լեյլի Ասլանյանը։ 2023 թվականի հուլիսի 1-ի դրությամբ վճարովի ծառայությունների դիմաց ստացված եկամուտների գումարը կազմել է 625 մլն 316 հազար դրամ, 2022 թվականի նույն ժամանակահատվածի համեմատ գումարն ավելացել է 87մլն 670 հազար դրամով: 2023 թվականի 1-ին կիսամյակում ստացվել է ՀՀ վարչապետին ուղղված և ՀՀ Շիրակի մարզպետի աշխատակազմ վերահասցեագրված, ինչպես նաև ՀՀ Շիրակի մարզպետին ուղղված ընդհանուր թվով 870 քաղաքացու դիմում։ Շիրակի մարզպետի որոշումներով ֆինանսական օգնություն է ստացել 466 քաղաքացի։ Այլ բնույթի հարցերով գրավոր պարզաբանումներ է տրվել 118 քաղաքացու։ 2023 թվականի 1-ին կիսամյակում հաշվառվել է 3 խնամատար ընտանիք և 2 երեխա տրվել է խնամատարության։
Շիրակի մարզպետի աշխատակազմի կրթության, մշակույթի և սպորտի վարչության պետ Հրայր Կարապետյանը ներկայացրել է 2022-2023 թվականների ուսումնական տարվա ամփոփումն ու մարզում համահայկական խաղերի կազմակերպմանը վերաբերող հարցեր: Ըստ զեկույցի, օլիմպիադաների հանրապետական փուլերին մարզից մասնակցել է 151 աշակերտ, մեդալակիր աշակերտների թիվը 25-ն է։
Պարտադիր ատեստավորման մասնակցել է 1124 ուսուցիչ, կամավոր ատեստավորման 2022-ին մասնակցել է 137 ուսուցիչ։
Մարզպետը կարևորելով ուսուցիչների գիտելիքների շարունակական կատարելագործումը հորդորել է վերապատրաստումներին և ատեստավորումներին առավել ակտիվ մասնակցել։
Հրայր Կարապետյանի տեղեկացմամբ, Համահայկական ամառային 8-րդ խաղերի ուղղությամբ Շիրակի մարզում տարվող աշխատանքները լայն թափով ընթացքի մեջ են։ Խաղերի ծրագրում ընդգրկված 19 մարզաձևերի մրցումներից՝ Շիրակի մարզի համայնքների թիմերը կմասնակցեն 17-ին։ Շիրակի մարզի 6 համայնքների պատվիրակությունների անդամների ընդհանուր թիվը 405 է, որից 283-ը մարզիկներ։ Արդեն իսկ մեկնարկել են Գյումրու քաղաքային մարզադաշտի արևմտյան հատվածին հարակից տարածքի հիմնանորոգման աշխատանքները։
Վարժական հավաքների կազմակերպման գործընթացի մասին անդրադարձել է աշխատակազմի զորահավաքային նախապատրաստության բաժնի պետ Մուշեղ Մարգարյանը՝ նշելով, որ կառավարության որոշմամբ հայտարարվել է վարժական հավաքներ՝ 2023 թվականի օգոստոսի 1-ից մինչև հոկտեմբերի 13-ը ներառյալ, պահեստազորի առաջին խմբի առաջին և երկրորդ կարգերում
հաշվառված շարքային, ենթասպայական և սպայական կազմերի պահեստազորայինների ընդգրկմամբ։
Մուշեղ Մուրադյանը համայնքների ղեկավարներին հորդորել է ակտիվ մասնակցություն ունենալ վարժական հավաքներին և սերտ համագործակցել համապատասխան մարմինների հետ։

Զեկույցները կցվում են