Շիրակի մարզպետի աշխատակազմ

 Շիրակի մարզպետ Մուշեղ Մուրադյանն աշխատակազմի պատասխանատուների հետ այսօր ընդունել է «Էրեբունի» բժշկական կենտրոնի գործադիր տնօրեն
Միքայել Մանուկյանին և «Գյումրի» բժշկական կենտրոնի տնօրեն Արմեն Իսահակյանին։ Հանդիպման ժամանակ քննարկվել են երկու բժշկական կենտրոնների համագործակցության ամրապնդմանն առնչվող հարցեր։
Շիրակի մարզպետը վստահեցրել է, որ գործակցության խորացմանը միտված նախաձեռնություններում կլինի նեցուկ և լիազորությունների շրջանակներում կաջակցի նոր նախաձեռնություններին․ «Բոլոր այն ծրագրերն ու նախաձեռնությունները, որոնք միտված են մարզում բժշկական ծառայությունների որակի բարձրացմանը, նոր ծառայությունների մատուցմանը՝ ես պատրաստ եմ լիազորություններիս շրջանակներում աջակցելու և անելու հնարավորը Շիրակի մարզում բուժսպասարկումը գործնականում առավել արդյունավետ դարձնելու համար»։
Միքայել Մանուկյանը շնորհակալություն է հայտնել մարզպետին ջերմ ընդունելության համար և վստահություն հայտնել, որ համագործակցության մասին առաջիկայում հնարավոր կլինի առավել առարկայական խոսել, քանզի պատրաստակամություն է տեսնում թե մարզպետի ու աշխատակազմի, թե «Գյումրի» բժշկական կենտրոնի տնօրենի կողմից։