Շիրակի մարզպետի աշխատակազմ

 «ՀՀ Վարչապետի գավաթ» 2023 թվականի սիրողական մրցաշարերին շիրակցիները նվաճել են 14 մեդալներ
Շիրակի մարզպետ Մուշեղ Մուրադյանն աշխատակազմի պատասխանատուների հետ այսօր հյուրընկալել է «ՀՀ Վարչապետի գավաթ» 2023 թվականի սիրողական մրցաշարերի շիրակցի մեդալակիրներին։
5 ոսկի, 4 արծաթ, 5 բրոնզ,  դրամական մրցանակի արժանացած 39 մասնակիցներ՝ սեղանի թենիսի, լողի, խճուղավազքի, թիմային խճուղավազքի, խճուղային հեծանվավազքի սիրողական մրցաշարերի ժամանակ արձանագրված ձեռքբերումներն են։
«Մեզ համար մեծ ոգևորություն և ուրախություն է արձանագրել, որ այս տարի ոչ միայն ձեռքբերումներով եք վերադարձել «Վարչապետի գավաթ» սիրողական մրցաշարերից, այլև նախորդ տարվա համեմատ ավելացրել եք մեդալների թիվը։ Շիրակը մարզական հարուստ ավանդույթներ ունեցող մարզ է միշտ եղել, այս տարի էլ հաղթանակներ տոնեցինք։ Շնորհակալ ենք բոլորիցդ` մեզ այնքան ոգևորություն պարգևելու, հաղթական ոգով տրամադրելու համար։ Մենք հպարտ ենք ձեզանով և պատրաստ՝ հնարավորությունների սահմաններում ձեզ աջակցելու և ոգեշնչելու»,- ողջույնի խոսքում նշել է Շիրակի մարզպետ Մուշեղ Մուրադյանը։
«ՀՀ Վարչապետի գավաթ» 2023 թվականի սիրողական մրցաշարերին ակտիվ մասնակցության, մրցանակային տեղեր զբաղեցնելու համար` Շիրակի մարզպետը պատվոգրով և հուշանվերներով է պարգևատրել մարզիկներին։
Մարզիկներն ու մարզիչները շնորհակալություն են հայտնել մարզպետին՝ ջերմ ընդունելության, աջակցության և ձեռքբերումները կարևորելու համար, հանդիպման ընթացքում նրանք Շիրակի մարզպետին պատմել են իրենց հաջողությունների և առաջիկա անելիքների մասին, ներկայացրել խնդիրներն ու մտահոգությունները: