Շիրակի մարզպետի աշխատակազմ

 2023-ը տքնաջան աշխատանքի, մարտահրավերների ու դրանց հաղթահարման, միաժամանակ բավական լուրջ ձեռքբերումների տարի էր․ Շիրակի մարզպետն ամփոփել է աշխատանքային մեկ տարին։
Ամփոփիչ մամուլի ասուլիսի ժամանակ Մուշեղ Մուրադյանը լրագրողներին ներկայացրել է բոլոր ոլորտներում իրականացված, ընթացքի մեջ գտնվող ծրագրերի մասին տեղեկատվություն, անդրադարձել՝ հիմնախնդիրներին՝ նշելով, որ ինչպես մարզպետի պաշտոնը ստանձնելու առաջին իսկ օրն է նշել, հիմա էլ նույն սկզբունքով է շարունակում աշխատել՝ թափանցիկ, հրապարակային և հաշվետվողական։
«Տարին ամփոփել ենք վճռականությամբ, որ շարունակելու ենք աշխատել նույն պատրաստակամությամբ, անելու ենք հնարավորը մեր լիազորությունների և կարողությունների սահմաններում բազմաթիվ խնդիրների լուծման համար, քանի որ արված աշխատանք կա, բայց դեռ անելիքներ էլ կան»,- նշել է Շիրակի մարզպետը։
Անդրադառնալով քաղաքաշինության բնագավառում 2023-ին իրականացված աշխատանքներին՝ մարզպետը նշել է, որ 19 մլրդ 661 մլն դրամի կապիտալ ներդրում է եղել, որը 4,5 մլրդ դրամով ավել է 2022-ի համեմատ։
«Գումարային առումով բաշխվածությունը տեսնում եք, աճ կա թե բնակարանաշինությանն ուղղված գումարներում՝ շուրջ 1 մլրդ դրամ ավել, թե կրթական, մշակութային և մարզական օբյեկտների շինարարության մեջ՝ 1,2 մլրդ-ով։ Բոլոր աշխատանքներում գումարների աճի դրական դինամիկա կա։ Բնակարանաշինության մասով ասեմ՝ 4 բնակելի համալիրների կառուցման աշխատանքներ են մեկնարկել 507 բնակարաններով, 11 կրթական և 1 մարզական օբյեկտների կառուցման աշխատանքներին 2023-ին ուղղվել է 3 մլրդ 106 մլն դրամ։ Մեծամասշտաբ ծրագրերից կառանձնացնեմ «Արթուր Ալեքսանյանի անվան հունա-հռոմեական ըմբշամարտի մանկապատանեկան դպրոցի» շինարարությունը, որի համար հատկացվել է 6.4 մլրդ դրամ, (2023թ՝ 1.3 մլրդ դրամ), ավարտը նախատեսվում է 2026-ին։ Կապիտալ ներդրումների առյուծի բաժինը ճանապարհաշինական աշխատանքներինն է՝ 10 մլրդ 100 մլն-ից ավելի, որը 2022-ի համեմատ 29,5 տոկոսով ավելի է»։
Ըստ այդմ ներկայացվել է, որ 2022-ի 65.93 կմ-ի փոխարեն, 2023-ին կառուցվել ու դեռ ընթացքի մեջ է 73.4 կմ-ի ճանապարհաշինական աշխատանք։ ՀՀ տարածքային կառավարման և ենթակառուցվածքների նախարարության պատվիրատվությամբ մարզում իրականացվում են ընդհանուր 7․3 մլրդ դրամի 8 ճանապարհաշինական ծրագրեր, որից 6-ը՝ 49.9 կմ երկարությամբ շուրջ 5 մլրդ դրամ գումարի շրջանակներում գտնվում են ավարտական փուլում։ Եվս 2 ճանապարհաշինական ծրագրերի՝ 15.9 կմ երկարությամբ, շուրջ 2.3 միլիարդ դրամ գումարի շրջանակներում, ավարտը նախատեսվում է 2024 թվականին: Հայաստանի տարածքային զարգացման հիմնադրամի պատվիրատվությամբ մարզում իրականացվում է շուրջ 2.8 միլիարդ դրամի 6 ծրագիր՝ 7.6 կմ երկարությամբ։ Աշխատանքներն ընթացքի մեջ են:
«Չծանրաբեռնելու համար ծրագրերն առանձին չեմ թվարկի, սակայն նշեմ, մեկ-երկու կարևոր ծրագրեր։ Մ-1, Երևան - Գյումրի - Վրաստանի սահման միջպետական նշանակության ավտոմոբիլային ճանապարհի Աշոցքից մինչև Բավրա ընկած 11.5 կմ հատվածի հիմնանորոգման համար պետական բյուջեից հատկացվելու է 2 մլրդ 325 մլն դրամ։ Ընթացքի մեջ են Նոր Կյանքից Մեծ Մանթաշ տեղական նշանակության ճանապարհի 12,8 կմ-ի հիմնանորոգման աշխատանքները, արժեքը՝ 1 մլրդ 543 մլն դրամ։ 810 մլն 967 հազար դրամ էլ ուղղվել է Հոռոմ - Արթիկ - Ալագյազ հանրապետական նշանակության ավտոմոբիլային ճանապարհի Փոքր Մանթաշ գյուղի 3,1 կմ հատվածի հիմնանորոգմանը»,- ընդգծել է Մուշեղ Մուրադյանը։
Մարզպետը կարևորել է անհետաձգելի համարվող կապիտալ բնույթի ծրագրերին, որոնց իրականացմանը ՀՀ կառավարությունը հատկացրել է 609 մլն 249 հազար դրամ՝ նշելով, որ այդ գումարների շնորհիվ կարողացել են անցած տարում լուծել անհետաձգելի լուծում պահանջող բազմաթիվ խնդիրներ։
Անդրադարձ է կատարվել նաև մարզի հիմնախնդիրներին, մասնավորապես, ոչ հիմնական շինություններին, վթարայիններին ու անօթևանությանը։ Մարզպետը նշել է, որ վարչապետի հանձնարարությամբ 2023 թվականի սեպտեմբեր ամսին համայնքների ղեկավարների կողմից տարվել են աշխատանքներ 2008 թվականի դրությամբ հաստատված երկրաշարժից անօթևան մնացած ընտանիքների հերթացուցակների ճշգրտման ուղղությամբ: 2023 թվականի սեպտեմբերի 30-ի դրությամբ ճշգրտված տվյալներով մարզում երկրաշարժից անօթևան մնացած ընտանիքների հերթացուցակներում դեռևս հաշվառված է 1227 ընտանիք, Գյումրիում՝ 1016 ընտանիք, այլ բնակավայրերում՝ 211 ընտանիք:
Շիրակի մարզպետը կարևորել է ՀՀ կառավարության կողմից իրականացվող 300 դպրոցի և 500 մանկապարտեզի նորոգման, կառուցման ծրագիրը՝ այն դիտարկելով ոչ միայն որպես կրթական ծրագիր, այլև ապագային միտված նախաձեռնություն․