Շիրակի մարզպետի աշխատակազմ

Սուբվենցիոն ծրագրերի վերահսկողության մշտադիտարկման աշխատանքային խումբը Շիրակի մարզպետ Մուշեղ Մուրադյանի գլխավորությամբ, մարզպետի տեղակալ Աննա Մարտիկյանի, Ախուրյան համայնքի ղեկավար Զավեն Մանուկյանի հետ այսօր հերթական շրջայցով եղել է Ախուրյան համայնքի մի քանի բնակավայրերում՝ հետևելու սուբվենցիոն ծրագրերով իրականացված և ընթացքի մեջ գտնվող շինարարական աշխատանքներին։
Պատասխանատուներն այցելել են Ախուրյան համայնքի Հացիկ բնակավայր, որտեղ պետություն-համայնք համագործակցության արդյունքում երկու փուլով վերակառուցվել է բնակավայրի մանկապարտեզը։
Մուշեղ Մուրադյանը շրջել է մանկապարտեզում, զրուցել շինարարի հետ, ծանոթացել աշխատանքերին՝ նշելով, որ արձանագրված թերացումները պետք է վերացվեն ամենասեղմ ժամկետներում և սա վերաբերում է բոլոր ծրագրերին․ «Որակով, ժամանակին առանց թերացումների աշխատանք իրականացնելը բոլոր շինարարական կազմակերպությունների պարտավորությունն է, վերահսկողության մեջ հոգացավ մոտեցումը բոլորիս համար աշխատանքային ամենակարևոր սկզբունքը պետք է լինի։ Պետական բյուջեից, համայնքի միջոցներից հատկացված գումարները միմիայն նպատակային պետք է ծախսվեն»։
Հացիկի մանկապարտեզի շինարարությունն իրականացվել է երկու փուլով, ծրագրի ընդհանուր արժեքը կազմել է 84 մլն 468 հազար դրամ, որից Կառավարությունը հատկացրել է 50 մլն 680 հազար դրամը։ 60 երեխայի համար նախատեսված մանկապարտեզի շինարարական աշխատանքներից զատ, մանկապարտեզի տարածքի բարեկարգումն ընդգրկվել է «Ախուրյան համայնքի թվով 10 բնակավայրերի մանկապարտեզների տարածքների բարեկարգման, կեղտաջրերի հեռացման, ջեռուցման համակարգերի տեղադրման աշխատանքներ» սուբվենցիոն ենթածրագրում։
Պատասխանատուների հաջորդ կանգառը Շիրակ բնակավայրում է եղել, որտեղ կառուցվել է 2 խմբասենյակով, 46 երեխայի համար նախատեսված նոր մանկապարտեզ։ Սուբվենցիոն այս ծրագրի պայմանագրային արժեքը կազմել է 74 մլն 122 հազար դրամ, որից Կառավարության համամասնությունը՝ 44 մլն 474 հազար է։ Շիրակի մանկապարտեզը ևս ընդգրկված է բարեկարգման սուբվենցիոն ծրագրում։
Շիրակի մարզպետը եղել է նաև Լեռնուտ բնակավայրում, որտեղ կառուցվել է 30 երեխայի համար նախատեսված մանկապարտեզ։ Շինաշխատանքների համար նախատեսվել է 71 մլն 797 հազար դրամ, որտեղ պետության մասնաբաժինը՝ 43 մլն 77 հազար դրամ։
Մշտադիտարկման աշխատանքային խումբը հետևել է նաև «Ջաջուռավան բնակավայրի մանկապարտեզի շենքի վերակառուցում» սուբվենցիոն ծրագրով իրականացված աշխատանքներին։ 30 երեխայի համար նախատեսված այս ծրագրի պայմանագրային արժեքը կազմել է 38 մլն 464 հազար դրամ, ՀՀ կառավարությունը տրամադրելու է 23 մլն 78 հազար դրամ։
Մուշեղ Մուրադյանը համայնքի ղեկավարի հետ քննարկել է մանկապարտեզների գործարկմանն առնչվող հարցեր՝ կարևորելով ՀՈԱԿ-ների ստեղծումը և նորակառույց մանկապարտեզները անխնամ չթողնելը։
Նշենք, որ պետական բյուջեի միջոցներով Հացիկ, Լեռնուտ և Ջաջուռավան բնակավայրերի մանկապարտեզներին հատկացվել է անհարժեշտ ողջ գույքը։
«Երբ կատարված աշխատանքի արդյունքը տեսանելի է, երբ թերացումներն ու բացթողումները վերջնական կշտկվեն և մանկապարտեզները կսկսեն աշխատել՝ բոլորիս համար պարզ կլինի, որ մեր մեկտեղված ջանքերի, համատեղ ու գործակցված աշխատանքով ունենք արդյունք, որը մեր երկրի բարեկեցիկ ապագայի համար է արվել»,- ընդգծել է Շիրակի մարզպետը։
Մարզպետը հետևել է նաև «Կրաշեն, Ջաջուռավան, Մեծ Սարիար բնակավայրեր տանող ավտոճանապարհի հիմնանորոգում և ասֆալտապատում» սուբվենցիոն ծրագրով իրականացված աշխատանքներին։ Ծրագրի նախահաշվային արժեքը 331,9 մլն դրամ է, իրականացվելու է 4,9 կմ ասֆալտապատում։ Ծրագրի առաջին փուլով ասֆալտապատվել է 1,1 կմ՝ 84 մլն 472 հազար դրամի շրջանակներում։