Շիրակի մարզպետի աշխատակազմ

 Շիրակի մարզպետ Մուշեղ Մուրադյանն աշխատակազմի պատասխանատուների հետ այսօր հյուրընկալել է Հայաստանի ազգային պարարվեստի միության նախագահ, «Բերդ» պարային անսամբլի գեղարվեստական ղեկավար Կարեն Գևորգյանին, ՀՀ մշակույթի վաստակավոր գործիչ Սամվել Գասպարյանին և «Մարինա» պարային համույթի գեղարվեստական ղեկավար Լիպարիտ Մարկոսյանին։
Ողջունելով հյուրերին՝ Շիրակի մարզպետը երախտագիտությունն է հայտնել պարարվեստի բնագավառում ներդում ունենալու համար՝ ընդգծելով, որ Կարեն Գևորգյանն ու Սամվել Գասպարյանը հայկական պարարվեստի զարգացման և տարածման գործում մեծ ավանդ ունեն։
«Հայկական պարը և հայ պարարվեստի առանձնահատկությունները պահպանելու, սերնունդներին փոխանցելու գործում ձեր վաստակը մեծ է, իսկ պարը մեր ազգային, հայկական ինքնության ամենավառ հաստատումն է, որը հնարավորություն է տալիս խոսել աշխարհի տարբեր երկրների ժողովուրդների հետ առանց լեզվական պատնեշների։ Ուրախ եմ ձեզ հանդիպելու և քննարկելու առաջիկա անելիքները։ Շիրակի մարզպետի աշխատակազմը ձեզ հետ սիրով կհամագործակցի և հնարավորությունների սահմաններում կաջակցի՝ իրականացնելու նախանշված ծրագրերը»,- նշել է Մուշեղ Մուրադյանը։
Հյուրերը շնորհակալություն են հայտնել մարզպետին ջերմ ընդունելության համար՝ նշելով, որ կարևոր է, երբ պետական պաշտոնյան մշակույթի պահպանման ու հանրահռչակման համար ջանք ու եռանդ չի խնայում։
Հանդիպման ժամանակ քննարկվել են Ախուրյանի ավանդական պար մշակելու ձեռնարկին, ինչպես նաև հանրակրթական դպրոցներում պարի դասերի կազմակերպմանն առնչվող հարցեր։