Շիրակի մարզպետի աշխատակազմ

 Հարգելի´շինարարներ
Ի սրտե շնորհավորում եմ ձեզ մասնագիտական տոնի` Շինարարի օրվա առթիվ:
Բացի այն, որ այս մասնագիտությունն ամենապատվաբերներից է, շինարարի աշխատանքով ու ստեղծարար մտքի շնորհիվ են վեր հառնում տարբեր կոթողներ, համայնքները դառնում` ավելի բարեկարգ ու բարետես, նորոգվում են ճանապարհներ, կառուցվում` ենթակառուցվածքներ։
Անկասկած, ցանկացած շինարարություն իրականացնելիս մեծ է ոլորտի մասնագետների ներդրումը՝ նախագծողից մինչև շինարար:
Հազարամյա մեր ազգային հարստությունները, որոնք որպես ժառանգություն ստացել ենք և որով ներկայանում ենք աշխարհին, նաև մեր տաղանդաշատ վարպետների անձնուրաց աշխատանքի արդյունքն են։
Հարգելի շինարարներ, դուք այսօր ևս վերահաստատում եք հայ ժողովրդի ապրելու, արարելու, արարելով հաղթելու գաղափարը։
Ձեզանից է կախված նաև այն, թե մենք ինչ ենք փոխանցելու սերունդներին, մեր երկրին պետք են կառուցող ու շենացնող շինարարներ, որոնց սրտացավ աշխատանքով քարը կդնենք քարին և կշենացնենք մեր երկիրն ու մարզը։
Այստեղ է, որ պետք է բոլորիդ հորդորեմ սրտացավ մոտենալ աշխատանքին, անել հնարավորը թերություններ չունենալու համար։
Վստահ կարող ենք ասել, որ մարզերում իրականացվող պետական բազմաթիվ ծրագրերի արդյունքում, այսօր ոլորտի որակյալ մասնագետների պահանջարկը մեծացել է, մնում է աշխատել հոգացավորեն և շենացնել մեր Շիրակն ու Հայաստանը։
Եվս մեկ անգամ շնորհավորելով Ձեզ, սիրելի շինարարներ, մաղթում եմ քաջառողջություն, աշխատանքային և ստեղծագործական նորանոր ձեռքբերումներ, թող Ձեր բազկի ուժը երբեք չպակասի, կառուցեք որակով և խղճով: