Շիրակի մարզպետի աշխատակազմ

 Շիրակի մարզպետ Մուշեղ Մուրադյանն աշխատակազմի պատասխանատուների հետ այսօր հյուրընկալել է «Գյումրի զարգացման լաբորատորիա» հիմնադրամի սաներին՝ գործադիր տնօրեն Անժելա Բալթայանի գլխավորությամբ։
«Գյումրի զարգացման լաբորատորիա» հիմնադրամի թիմը օրերս հաղթել է Ռոբոտների Համաշխարհային Օլիմպիադայի ազգային փուլում, այժմ պատրաստվում է ներկայացնել Հայաստանը Իտալիայում՝ միջազգային փուլում։
Մուշեղ Մուրադյանը ողջունել է պատանի նորարարներին և նշել, որ առանձնակի ոգևորությամբ է լսել նրանց ձեռքբերումների մասին․ «Այնքան ուրախ եմ, որ դուք նախաձեռնող եք, նախաձեռնողականության մեջ՝ ստեղծարար, վստահ եմ, որ դուք այն նոր շունչն ու տեղեկատվական տեխնոլոգիաների բնագավառում նորը ստեղծողն եք լինելու, որի մասին դեռ լսելու ենք։ Շիրակի մարզպետի աշխատակազմը միշտ սիրով կհույրընկալի ձեզ և հնարավորությունների սահմաններում կաջակցի։ Ձեզ մնում է քայլել միշտ առաջ, սովորել ու երբեք չընկրկել խոչընդոտներից»։
Հիմնադրամի սաները մարզպետին են պատմել կայացած մրցույթից և իրենց աշխատանքներն են ներկայացրել՝ շնորհակալություն հայտնելով ջերմ ընդունելության և վերաբերմունքի համար։
Նշենք, որ 2023-ի ընթացքում «Գյումրի զարգացման լաբորատորիա» հիմնադրամի սաները մասնակցել են 4 հանրապետական ու միջազգային մրցույթների, 7 թիմ ներկայացնելով՝ գրավել 1-3 մրցանակային հորիզոնականներ։
Թիմը առանձակի ոգևորությամբ սպասում է սեպտեմբերին Իտալիայում կայանալիք օլիմպիադային։
Մուշեղ Մուրադյանը սաներին հաջողություն ու հաղթանակ է մաղթել օլիմպիադայում և նշել, որ սիրով կսպասի հաղթական լուրերի։