Շիրակի մարզպետի աշխատակազմ

 Շիրակի մարզպետ Մուշեղ Մուրադյանն աշխատակազմի պատասխանատուների հետ այսօր այցելել է Շիրակի երկրագիտական թանգարան։ Թանգարանի տնօրեն Մերուժան Մինասյանի, գիտաշխատողների ուղեկցությամբ մարզպետը շրջել է թանգարանում, ծանոթացել այնտեղ պահվող եզակի, անգին ցուցանմուշներին, հնագիտական գտածոներին, լսել դրանց հայտնաբերման պատմությունները։
Անդրադառնալով թանգարանի առջև ծառացած խնդիրներին՝ Մուշեղ Մուրադյանն առաջնային է համարել շենքային խնդրի լուծումը։
«Շիրակի երկրագիտական թանգարանն ինքնատիպ է ու յուրօրինակ, քանի որ այստեղ պահպանվում են այնպիսի գտածոներ, որոնց արժեքն անչափելի է։ Մեր արմատների, մեր բազմադարյա պատմության մասին բառերով պետք չէ խոսել, այստեղ պահվող գտածոներն իրենք կպատմեն հայ ժողովրդի հազարամյա ուղու մասին, կխոսեն փաստերով, անգամ սարսուռ է անցնում մարդու մարմնով, երբ աչք է անցկացնում երկրագիտականի ցուցանմուշներովլ։ Թանգարանի ներուժը հասարակությանն առավել հասանելի կլինի շենքային բարեկարգ պայմաններ ունենալու դեպքում։ Վստահեցնում եմ՝ Շիրակի մարզպետի աշխատակազմն իրավասությունների շրջանակներում պատրաստ է քննարկելու խնդրի լուծման տարբերակներ, իմ այցի նպատակը հենց այդ տարբերակների համատեղ դիտարկումն ու առավել արդյունավետ որոշման հանգելն է»,- ընդգծել է մարզպետը։
Հանդիպման ժամանակ քննարկվել են թանգարանին նախապես ժամանակավոր առավել մեծ ու հարմարավետ տարածք հատկացնելու տարբերակներ, անդրադարձ է կատարվել նաև հիմնական շինություն ունենալու հնարավոր ծրագրերի, որոնց առարկայացման ուղղությամբ առաջիկայում քայլեր կձեռնարկվեն։
Նշենք, որ երկրագիտական թանգարանում ամփոփված են պատմական Շիրակ գավառի նյութական և հոգևոր մշակույթն արտացոլող շուրջ 25 հազար ցուցանմուշներ, այդ թվում` հին քարե դարի՝ 500 հազար տարվա վաղեմության եզակի նմուշներից մինչև ուշ միջնադարի խեցեգործական ցուցանմուշներ ու զարդեր, ամենահին երաժշտական գործիքներ, 2000 տարվա հնության ապակեղեն, Տրոգոնթերյան փղի ժանիքն ու կենդանիների հիանալի պահպանված մնացորդներ, կարպետներ, գորգեր ու զենքեր։