Շիրակի մարզպետի աշխատակազմ

Շիրակի մարզպետ Մուշեղ Մուրադյանի հանձնարարությամբ մարզպետի տեղակալաներ Ալբերտ Այվազյանն ու Աննա Մարտիկյանն աշխատակազմի պատասխանատուների հետ եղել են Աշոցք համայնքում։ Համայնքի ղեկավար Կարեն Մանուկյանի, համայնքապետարանի աշխատակիցների հետ դիտարկվել է «Աշոցք համայնքի Թորոսգյուղ բնակավայրի 1-ին փողոցի և Բավրա բնակավայրի 6-րդ փողոցի սալարկում» սուբվենցիոն ծրագրով իրականացվող աշխատանքները։ 2024-ի սուբվենցիոն այս ծրագրի ընդհանուր արժեքը 47 մլն 290 հազար դրամ է, գումարի 70 տոկոսը Կառավարությունն է փոխհատուցելու։
Մարզպետի տեղակալները համայնքապետի հետ այնուհետև հետևել են «Աշոցք համայնքի Բավրա, Զույգաղբյուր, Ղազանչի և Կարմրավան բնակավայրերի բնական գազի ներքին ցանցի կառուցում» սուբվենցիոն ծրագրով Կարմրավան բնակավայրում մեկնարկած աշխատանքներին։ Սուբվենցիոն ծրագրով 4 բնակավայրերում իրականացվող աշխատանքների ընդհանուր արժեքը 56 մլն 825 հազար դրամ է, որից 60 տոկոս պետությունն է հատկացնելու։
«Աշոցք համայնքի Աշոցք բնակավայրի կենտրոնական հրապարակի և Մեծ Սեպասար բնակավայրի 1-ին փողոցի ասֆալտապատում» 109 մլն 140 հազար դրամ արժողությամբ սուբվենցիոն ծրագրի գումարի 50 տոկոսը ևս Կառավարության փոխհատուցումն է լինելու։ Մարզպետի տեղակալները հետևել են Աշոցքի հրապարակում իրականացվող աշխատանքների ընթացքին, հրապարակի հատվածի համար նախատեսվել է 72,6 մլն դրամ։
Մարզպետի տեղակալները հետևել են նաև Թավշուտի ոռոգման ցանցի շինաշխատանքներին։ Սուբվենցիոն ծրագիրը մեկնարկել է 2023 թվականին, երկրորդ փուլով աշխատանքներն այժմ են իրականացվում։ Ծրագրի ընդհանուր արժեքը 67 մլն 193 հազար դրամ է, գումարի 75 տոկոսը պետությունն է տրամադրելու։
Բոլոր շինօբյեկտներում շրջայցի ժամանակ, շինարարների և պատասխանատուների հետ զրույցում, մարզպետի տեղակալները փոխանցել են Մուշեղ Մուրադյանի հանձնարարականը՝ անել հնարավորը թե որակի ապահովման, և թե ժամկետներում տեղավորվելու համար։
Սուբվենցիոն ծրագրերի դիտարկումից զատ, մարզպետի տեղակալները հետևել են նաև Մ-1, Երևան-Գյումրի-ՀՀ պետական սահման միջպետական նշանակության ավտոճանապարհի կմ 160+200-կմ171+700 հատվածում իրականացվող հիմնանորոգման աշխատանքներին։
11.5կմ երկարությամբ հիմնանորոգվող ճանապարհահատվածն ընդգրկում է Աշոցքն ու հասնում Բավրա (սահմանային անցակետ)։ Ծրագրի պայմանագրային արժեքը շուրջ 2 մլրդ 338 մլն դրամ է։ Հիմնանորոգումը կատարվում է ՀՀ պետական բյուջեի ֆինանսավորմամբ։ Հիմնանորոգման աշխատանքները մեկնարկել են 2023 թվականին։ Ասֆալտապատումից հետո ճանապարհը կկահավորվի անվտանգության տարրերով։ Աշխատանքները շուտով կավարտվեն։