Շիրակի մարզպետի աշխատակազմ

 ՀՀ վարչապետի գավաթ» խճուղային հեծանվավազքի սիրողական մրցաշարին նախապատրաստվելու նպատակով այսօր Շիրակի մարզի 116 դպրոց (միջնակարգ, ավագ դպրոցներ, վարժարաններ) ԿԳՄՍ նախարարության կողմից նվեր է ստացել 232 հեծանիվ։ Յուրաքանչյուր դպրոցի հատկացվել է 2-ական հեծանիվ և սաղավարտ։
Շիրակի մարզպետ Մուշեղ Մուրադյանը կրթական հաստատությունների տնօրեններին շնորհավորել է մարզական նոր գույք ստանալու առթիվ և հորդորել լավ նախապատրաստվել հեծանվավազքի առաջիկա մրցաշարին․ «Իրավամբ, «Վարչապետի գավաթ» մրցաշարը դպրոցականների շրջանում առողջ ապրելակերպի մասսայականացման, ֆիզկուլտուրայի և սպորտի քարոզչության ապահովման լավագույն հնարավորություններից է։ Շիրակի մարզը միշտ մարզական դարբնոց է եղել, մեր մարզիկները տասնամյակներ շարունակ բազմաթիվ մեդալներ են նվաճել: Վստահ եմ՝ ֆիզկուլտուրայի դասերն այսուհետ առավել բովանդակալից կընթանան և մեր դպրոցականները կգրանցեն առավել լավ արդյունքներ»։
Նշենք, որ սեպտեմբերի 28-29-ը Գեղարքունիքի մարզի Շողակաթ համայնքի 20 կմ ճանապարհահատվածում կանցկացվի «ՀՀ վարչապետի գավաթ» խճուղային հեծանվավազքի մրցաշար՝ ՀՀ հանրակրթական ուսումնական հաստատությունների 10-12-րդ դասարանների աշակերտներից կազմված հավաքական թիմերի միջև: