Շիրակի մարզպետի աշխատակազմ

 Ավետիք Իսահակյանի ծննդյան 150-ամյակին ընդառաջ կազմակերպվող միջոցառումների մեկնարկն այսօր տրվել է Վարպետի ծննդավայրում` Իսահակյան բնակավայրում։
Բանաստեղծի արձանի մոտ տեղի է ունեցել «Ալագյազի մանիներ» մուլտֆիլմի շնորհանդեսը, որին ներկա են գտնվել մարզպետի տեղակալներ Ալբերտ Այվազյանն ու Աննա Մարտիկյանը, ԿԳՄՍ նախարարության, մարզպետի աշխատակազմի պատասխանատուները, Անի համայնքի ղեկավար Արման Սարիբեկյանը, Ավետիք Իսահակյանի տուն-թանգարանի տնօրեն Արմենուհի Ավետիսյանը, թանգարանի աշխատակիցներ։
Շիրակի մարզպետ Մուշեղ Մուրադյանի անունից ներկաներին ողջունել և մարզպետի գնահատանքի խոսքն է փոխանցել մարզպետի տեղակալ Աննա Մարտիկյանը.
«Ողջունում եմ հայ մեծանուն բանաստեղծ, արձակագիր, հասարակական գործիչ, Մեծ Վարպետ Ավետիք Իսահակյանի համանուն պոեմի հիման վրա ստեղծված «Ալագյազի մանիներ» մուլտֆիլմի շնորհանդեսի առթիվ, որտեղ ներկայացված են Շիրակ աշխարհի ոչ նյութական մշակութային ժառանգության բազմաթիվ արժեքներ։
Անչափ ոգևորիչ է, որ առաջին ցուցադրությունը կազմակերպվել է բանաստեղծի ծննդավայրում՝ Անի համայնքի Իսահակյան բնակավայրում, որտեղ անցել է տաղանդաշատ հայի մանկությունը։
Վստահ եմ՝ բնության այս գողտրիկ անկյունում, մաքուր օդն ու բարձր տրամադրությունը մեծ նախադրյալներ են ստեղծում ներկաներին լիարժեք զգալ իսահակյանական շունչն ու դիտել բանաստեղծի մշակութային ժառանգության հիման վրա ստեղծված մուլտֆիլմը։ Պատահական չէ, որ Իսահակյանի մտքի նրբությունն ու խորությունը ցնցում է մարդու միտքն ու հոգին, չէ որ Վարպետի տաղանդը ծնունդ է առել Շիրակի կենարար հողից ու բնությունից։
Ինչպես հանրաճանաչ գրող Էրենբուրգն է ասել՝ «Իսահակյանը պատկանում է այն բանաստեղծների դասին, որոնք հազվադեպ են ծնվում: Համոզված եմ, որ նա կապրի դարեր ու դարեր»։
Այո մեծ շիրակցին կապրի դարեր ու դարեր»։
Նշենք, որ «Ալագյազի մանիներ» մուլտֆիլմը Ավետիք Իսահակյանի տուն-թանգարանը ստեղծել է ՀՀ ԿԳՄՍ նախարարության տրամադրած «Ոչ նյութական մշակութային ժառանգության պահպանության ծրագրեր» անվանակարգի դրամաշնորհի միջոցներով։