Շիրակի մարզպետի աշխատակազմ

 Լրատվամիջոցների հարգելի ներկայացուցիչներ, մամուլի բնագավառի հարգարժան աշխատակիցներ,
Սրտանց շնորհավորում եմ Ձեզ մասնագիտական տոնի՝ Հայ մամուլի օրվա առթիվ:
Շուրջ 230 տարի առաջ այս օրն օտար հողում առաջին հայկական ամսագրի՝ «Ազդարար»-ի հրապարակումը վկայում է հայ մտքի, խոսքի ազատության նկատմամբ մեծ ձգտման, հայ մամուլի ինքնատիպության ու կարևորության մասին։
Այսօր պատեհ առիթ է խոսելու լրատվական գործի բարդ ու պատասխանատու լինելու մասին և ընդգծելու, որ լրատվամիջոցների աշխատանքի շնորհիվ բազմաթիվ խնդիրներ են բարձրացվում և հասանելի դառնում հասարակությանը, որն օգնում է տարբեր ոլորտներում գոյություն ունեցող թերությունների ու բացթողումների վերացմանը:
Կարող ենք փաստել, որ հայաստանյան լրատվական դաշտն այսօր, օգտագործելով խոսքի ազատության ու կարծիքների արտահայտման լայն հնարավորությունները, աչքի է ընկնում հասարակական հետաքրքրություն ներկայացնող, հասարակության շահերից բխող հարցեր բարձրացնելու և մեծամասամբ դրանց պատասխանները գտնելու կարողությամբ։
Մամուլի ազատության երաշխավորման, ոլորտի զարգացման և կայացման ուղղությամբ մեր Կառավարությունն այնպիսի քայլեր է ձեռնարկում, շնորհիվ որոնց լրատվամիջոցների աշխատանքն առավել ազատ է ու պաշտպանված:
Դրա վառ ապացույցը «Լրագրողներ առանց սահմանների» կազմակերպության 2024-ի զեկույցն է, որտեղ նշվում է, որ Հայաստանը մամուլի ազատության ինդեքսը 180 երկրների մեջ բարելավել է 6 հորիզոնականով՝ 49-ից տեղափոխվելով 43-րդ հորիզոնականը։
Տարին ձեռքբերումների է եղել ու թող դրանք լինեն շարունակական։
Եվս մեկ անգամ շնորհավորելով մասնագիտական տոնի առթիվ` բոլորիդ մաղթում եմ ստեղծագործական եռանդ, խաղաղ երկրում ստեղծագործելու և արարելու նոր մտահղացումներ։