Շիրակի մարզպետի աշխատակազմ

 Գյուղատնտեսության բնագավառի հարգելի՛ ներկայացուցիչներ, սիրելի շիրակցիներ
Շնորհավորում եմ գյուղատնտեսության աշխատողի օրվա առթիվ։
Գյուղատնտեսությունն այն բնագավառն է, որտեղ աշխատելը անմնացորդ նվիրում, հողի ու հայրենիքի հանդեպ սեր է պահանջում։
Շիրակն ավանդաբար եղել և մնում է գյուղատնտեսական ուղղվածություն ունեցող մարզ, որի բնակիչները անդուլ աշխատանքով, հողի ու բնության հետ կռիվ տալով են ապրել ու շենացրել մեր մարզն ու երկիրը։
Այժմ, երբ մեր Կառավարությունը բազմաթիվ աջակցության ծրագրեր է իրականացնում` գյուղացիական տնտեսություններին հնարավորինս շուտ ոտքի կանգնեցնելու, գյուղատնտեսությամբ զբաղվելը առավել շահավետ դարձնելու ուղղությամբ, մեր աշխատասեր ու հոգացավ տնտեսություններին մնում է ջանք ու եռանդ չխնայել` հողից ավելի շատ բերք ստանալու, սեփական եկամուտներն օր առաջ ավելացնելու համար։
Ձեր վաստակն անգնահատելի է ոլորտի հարգարժան գիտակներ, որ անդադար աշխատանքով զարգացնում եք բնագավառը նորարարական ծրագրերով ու տեխնոլոգիաների ներդրմամբ։
Մեծագույն հարգանքով ու գնահատանքով երախտագիտությունս եմ հայտնում մեր հողագործ, շենացնող, քարից հաց քամող գյուղացիական բոլոր տնտեսություններին ու ոլորտի բազմափորձ մասնագետներին, ցանկանում եմ բոլորիդ բերքառատ տարիներ, խաղաղ ու արդյունավետ աշխատանք, անսպառ եռանդ, հավատ վաղվա առավել լավ օրվա հանդեպ։