Շիրակի մարզպետի աշխատակազմ

 Շիրակի մարզպետի տեղակալներ Աննա Մարտիկյանն ու Ալբերտ Այվազյանն աշխատակազմի պատասխանատուների հետ այսօր հյուրըկալել են Ֆրանսիայի Բուրդելի թանգարանի տնօրեն Օֆելի Ֆերլիե-Բուային, Փարիզի թանգարանների տարածքային և միջազգային բաժնի տնօրեն Սելին Մարշանին և ՀՀ-ում Ֆրանսիայի դեսպանատան մշակութային գծով պատասխանատուներին։
Աննա Մարտիկյանը հյուրերին է փոխանցել մարզպետ Մուշեղ Մուրադյանի ողջույններն ու նշել, որ մարզպետի աշխատակազմը կարևորում է հայ-ֆրանսիական բարեկամության ամրապնդումն ու ապակենտրոնացված համագործակցությունը՝ դրա համար լավագույն հիմք համարելով մինչ այժմ ունեցած հանդիպումներն ու դրանց արդյունքում իրականացված տարբեր ծրագրերը։
Հանդիպման ժամանակ քննարկվել են գեղանկարիչ Մինաս Ավետիսյանի Ջաջուռ գյուղում գտնվող հայրենի տունը արվեստագետների կացարանի և ցուցահանդեսային տարածքի վերածելուն առնչվող հարցեր:
Հյուրերը մարզպետի տեղակալներին տեղեկացրել են, որ նախորդ օրը հանդիպել են մեծ նկարչի որդիներին և քննարկել մշակութային նոր ծրագրի կյանքի կոչմանը վերաբերող հարցեր։
Աննա Մարտիկյանը մարզպետի անունից նշել է, որ մարզպետի աշխատակազմը լիազորությունների շրջանակում կաջակցի ծրագրի իրականացմանն ու կանի հնարավորը մարզի մշակութային կյանքի ակտիվացման, մշակութային ժառանգության պահպանման ու հանրահռչակման համար։