Շիրակի մարզպետի աշխատակազմ

 Շիրակի մարզում կայացել են հանրակրթական ուսումնական հաստատությունների «Ֆիզկուլտուրա» առարկայի ուսուցիչների համար՝ ՀՀ կրթության, գիտության, մշակույթի և սպորտի նախարարության ու Հայաստանի հեծանվային սպորտի ֆեդերացիայի կողմից համատեղ կազմակերպված սեմինար պարապմունքները։
Ֆեդերացիայի պատասխանատուները ներկայացրել են ուսումնական հաստատություններին տրամադրված հեծանիվների շահագործման և պահպանման հետ կապված բոլոր տեխնիկական պահանջները։
Քննարկվել են նաև դպրոցականների շրջանում «ՀՀ վարչապետի գավաթ» խճուղային հեծանվավազքի սիրողական մրցաշարի կազմակերպման հետ կապված հարցեր։
Կարևորելով աշակերտների հետ հեծանվային պարապմունքների կազմակերպումը՝ քննարկվում է «Ֆիզկուլտուրա» առարկայի ուսումնական հիմնական ծրագրում հեծանիվ վարելու ուսուցումը ներառելու, ինչպես նաև սովորողների հեծանիվ վարելու կարողությունները զարգացնելու նպատակով մարզական խմբակներ ստեղծելու հարցերը: