Շիրակի մարզպետի աշխատակազմ

 Պարտականությունները պատշաճ կատարելու, անմնացորդ նվիրումի, հայրենանվեր ու անձնուրաց ծառայության, 25-օրյա վարժական հավաքների կազմակերպչական աշխատանքները պատշաճ կազմակերպելու համար՝ Շիրակի մարզպետ Դավիթ Առուշանյանն այսօր պատվոգրեր է հանձնել ՀՀ Պն հանրապետական զինվորական կոմիսարիատի Շիրակի մարզի զինվորական կոմիսար Մուշեղ Ասատրյանին և Շիրակի մարզի զինվորական կոմիսարիատի ու տարածքային կառույցների մի շարք պատասխանատուների։
«Անչափ գնահատելի է, երբ զորահավաքային գործընթացում ներգրավված պատասխանատու կառույցներն ու մասնագետներն աշխատանքում հոգատար ու հետևողական են, մեր համատեղ աշխատանքը պտուղներ է տվել և Շիրակի մարզը վարժական հավաքները կազմակերպելիս առաջադրանքը կատարել է 100 տոկոսով։ Հայրենիքը սիրել նշանակում է ամեն մեկն իր աշխատանքը պատշաճ կատարել նաև, մենք խաղաղության ենք ձգտում և մեր օրակարգում չի կարող պատերազմն առաջնահերթություն լինել, սակայն պատրաստված մասնագետներ ու պահեստազորայիններ ունենալն էլ պակաս կարևոր չէ։ Շնորհակալ եմ բոլորից պատշաճ աշխատանքի համար, անփորձանք ու խաղաղ ծառայություն եմ մաղթում»,- նշել է Շիրակի մարզպետը։
ՀՀ Պն հանրապետական զինվորական կոմիսարիատի Շիրակի մարզի զինվորական կոմիսար Մուշեղ Ասատրյանը շնորհակալություն է հայտնել Դավիթ Առուշանյանին համատեղ աշխատանքի և գնահատող վերաբերմունքի համար՝ նշելով, որ այն առավել պարտավորեցնող է։
Մարզպետը տեղում ծանոթացել է նաև մարզի զինվորական կոմիսարիատի բժշկական հանձնաժողովի աշխատանքներին։