Շիրակի մարզպետի աշխատակազմ

 Շիրակի մարզպետ Դավիթ Առուշանյանը տեղակալներ Ալբերտ Այվազյանի և Արտուշ Հովհաննիսյանի, աշխատակազմի պատասխանատուների հետ այսօր հանդիպել է Հայաստանում ՄԱԿ-ի Փախստականների գործակալության (ՄԱԿ/ՓԳՀ/UNHCR) աշխատակիցներին՝ Աննա Կոպցյուխին, Շրուտի Պրասադին և Արևիկ Ճուլհայեանին:
Մարզպետը ողջունելով հյուրերին` կարևորել է գործակալության առաքելությունն ու մարզում փախստականներին աջակցող ծրագրերի իրականացումը, հատկապես անդրադառնալով Լեռնային Ղարաբաղից բռնի տեղահանված ընտանիքների հիմնախնդիրներին և պետության կողմից իրականացվող աջակցության ծրագրերին։
«Կարևոր առաքելություն եք իրականացնում Հայաստանում, հատկապես հաշվի առնելով վերջին շրջանում Լեռնային Ղարաբաղից բռնի տեղահանված մեր հայրենակիցներին աջակցելը։ Շիրակի մարզպետի աշխատակազմը պատրաստ է լիազորությունների շրջանակում համատեղ ջանքերով անել հնարավորը՝ մեր քույրերի ու եղբայրների հոգսերի թեթևացման, նրանց ինտեգրման նպատակով։ Մինչ օրս Կառավարությունը շարունակում է աջակցության ծրագրերի իրականացումը, ընթացքի մեջ է բնակապահովման ծրագիրը։ Անելիքներ դեռ շատ ունենք և պատրաստ ենք ձեռք ձեռքի աշխատել բոլոր հոգացավ կազմակերպությունների հետ»,- նշել է Շիրակի մարզպետը՝ ընդգծելով, որ ինքն անձամբ, ինչպես նաև մարզպետի աշխատակազմում ձևավորված աշխատանքային խմբերը պարբերաբար այցելում են մարզում բնակություն հաստատած ընտանիքներին՝ նրանց հոգսերի ու խնդիրների լուծման նպատակով։
Մարզպետն անդրադարձել է նաև համայնքային այցելությունների շրջանակում, ԼՂ-ից բռնի տեղահանված բնակչության հետ հանդիպումներին՝ նշելով, որ հաճախակի հանդիպումները հնարավորություն են տալիս ոչ միայն գույքագրել նրանց կողմից բարձրացված խնդիրները, այլև նրանց կրկին ներկայացնել մարզի ներուժն ու առկա հնարավորությունները և պետական աջակցության ծրագրերը։
ՄԱԿ ՓԳՀ աշխատակիցները շնորհակալություն են հայտնել ջերմ ընդունելության և համագործակցության պատրաստակամության համար՝ բարձր գնահատելով տեղահանված ընտանիքների նկատմամբ Շիրակի մարզի սրտացավ վերաբերմունքը և այդ ընտանիքների բնականոն կյանքի վերականգնմանն ու ինտեգրմանն ուղղված ջանքերը։
Հանդիպման ավարտին կողմերը պայմանավորվածություն են ձեռքբերել շարունակել համագործակցությունն ու ամրապնդել կապերը՝ տեղահանված ընտանիքների խնդիրների արագ լուծման ու ինտեգրումն ապահովելու նպատակով։