Շիրակի մարզպետի աշխատակազմ

 Քաղաքաշինական ծրագրերի վերահսկողության մշտադիտարկման աշխատանքային խումբը մարզպետի տեղակալ Արտուշ Հովհաննիսյանի գլխավորությամբ շարունակում է շրջայցերը մարզի այն դպրոցներ, որոնք կառուցվում, նորոգվում և հիմնանորոգվում են պետական միջոցներով։
Շիրակի մարզպետ Դավիթ Առուշանյանի հանձնարարությամբ պատասխանատուները եղել են Գյումրու մի շարք դպրոցներում, մասնավորապես, Գյումրու թիվ 32, 31, 20, 11 դպրոցներում։
Բոլոր դպրոցներում ընթացքի մեջ են նորոգման աշխատանքները, դրանք իրականացվում են Հայաստանի տարածքային զարգացման հիմնադրամի պատվիրատվությամբ։
«Գյումրու թիվ 32 հիմնական դպրոցի» հիմնանորոգման նպատակին նախատեսվել է 175 մլն 160 հազար դրամ, 214 մլն 620 հազար դրամի շրջանակներում էլ իրականացվում են «Գյումրու թիվ 31 հիմնական դպրոցի» վերանորոգման աշխատանքները։ «Գյումրու թիվ 20 հիմնական դպրոցի» նորոգման ծրագրի արժեքը կազմել է 227 մլն 680 հազար դրամ։ Պատասխանատուները եղել են նաև «Գյումրու թիվ 11 հիմնական դպրոցում», որի վերանորոգման նպատակին պետական բյուջեից հատկացվել է 515 մլն 940 հազար դրամ։
Նախօրեին դիտարկվել է նաև Ամասիայի միջնակարգ դպրոցի նոր մեկնարկած աշխատանքների ընթացքը։ Նոր դպրոցի կառուցման աշխատանքներին հետևել են մարզպետի խորհրդականներ Վանիկ Մարտիրոսյանն ու Գրիգոր Ավետիսյանը։ Շինաշխատանքների համար պետությունը հատկացրել է 2 մլրդ 45 մլն 313 հազար դրամ։ Աշխատանքներն իրականացվում է Հայաստանի տարածքային զարգացման հիմնադրամի պատվիրատվությամբ։
Պատասխանատուներն այցելել են նաև Թավշուտ և Ղազանչի բնակավայրերի դպրոցներ՝ խնդիրների գույքագրման, բարձրացված հարցերի ուսումնասիրության նպատակով։