Շիրակի մարզպետի աշխատակազմ

 Քաղաքաշինական ծրագրերի վերահսկողության մշտադիտարկման աշխատանքային խումբը՝ Շիրակի մարզպետ Դավիթ Առուշանյանի հանձնարարությամբ, շարունակում է շրջայցերը մարզի դպրոցներ, որոնք պետական միջոցներով են կառուցվում, նորոգվում և հիմնանորոգվում։
Մարզպետի տեղակալ Արտուշ Հովհաննիսյանի գլխավորությամբ պատասխանատուները նախօրեին դիտարկել են «Գյումրու Օյունջյան միջնակարգ դպրոց-վարժարանում» իրականացվող վերանորոգման աշխատանքների ընթացքը։ Շինաշխատանքների համար պետությունը հատկացրել է 200 մլն 500 հազար դրամ գումար։
Աշխատանքային խումբը հետևել է նաև Ախուրյանի թիվ 2 և Կառնուտի դպրոցներում իրականացվող նորոգման աշխատանքներին։
«Ախուրյանի թիվ 2 հիմնական դպրոցի» վերանորոգման ծրագրի արժեքը կազմել է 71 մլն 139 հազար դրամ։ 154 մլն դրամ գումար էլ պետությունը նախատեսել է «Կառնուտի միջնակարգ դպրոցի» վերանորոգման նպատակին։
Բոլոր դպրոցների վերանորոգման աշխատանքներն իրականացվում է Հայաստանի տարածքային զարգացման հիմնադրամի պատվիրատվությամբ։
Արտուշ Հովհաննիսյանը պատասխանատուներին հորդորել է լինել առավել ուշադիր, իսկ շինարարներին՝ բացառել թերացումներն ու ձգձգումները՝ փոխանցելով մարզպետի հանձնարարականը՝ անել հնարավորը պետական միջոցները նպատակային ծախսելու և ժամկետների մեջ տեղավորվելու համար։