Պաշտոնական էլ. փոստ
(միայն www.e-citizen.am համակարգով ծանուցումների համար)
Նորություններ
«Ագաթ» կենտրոնում ստեղծվել է համայնքի առաջին «Ներառականության պատը»
26.11.2025
Շիրակի մարզպետի տեղակալ Արտուշ Հովհաննիսյանն այսօր «Ագաթ» հաշմանդամություն ունեցող կանանց իրավունքների պաշտպանության կենտրոնում ներկա է գտնվել համայնքի առաջին «Ներառականության պատի» ստեղծման արարողությանը։ 70 կերամիկե սալիկներից մեկն էլ պատին ամրացրել է մարզպետի տեղակալը՝ վստահություն հայտնելով, որ պատն արտացոլելու է հավասարության և ներառականության գաղափարները։ Սալիկները պարունակում են հավասարության, մարդու իրավունքների և ներառականության վերաբերյալ նախապես հավաքագրված արտահայտություններ և կոչեր։
«Ագաթ» հաշմանդամություն ունեցող կանանց իրավունքների պաշտպանության կենտրոն հասարակական կազմակերպության նախագահ Կարինե Գրիգորյանի խոսքերով քաղաքի ծայրամասային թաղամասի ընտրությունը նպատակ ունի ընդգծելու, որ ներառականությունը պետք է հասնի յուրաքանչյուր համայնք, չկենտրոնանա միայն քաղաքի կենտրոնում։
Պատի ստեղծման աշխատանքներն իրականացվել են «Միասին՝ հանուն ներառականության» ծրագրի շրջանակներում, որի նպատակը Հայաստանի, Վրաստանի և Մոլդովայի միջև տարածաշրջանային համագործակցության խթանումն է՝ ապահովելով հաշմանդամություն ունեցող անձանց լիարժեք ներառումն ու մասնակցությունը հասարակական կյանքին։ Ծրագրի շրջանակներում հաշմանդամություն ունեցող անձանց ներուժի վերաբերյալ իրազեկվածությունը բարձրացնելու նպատակով վերը նշված երկրներում իրականացվելու են իրազեկման արշավներ։
