Շիրակի մարզպետի աշխատակազմ

Հարգելի՛ հայրենակիցներ,
Սիրել՛ի շիրակցիներ,
Այս տարի առաջին անգամ, որպես պետականորեն հաստատված հիշատակի օր, նշում ենք Հայրենիքի պաշտպանության համար զոհվածների հիշատակի օրը: Թեպետ այն օրացուցային ամրագրում է ստացել միայն այժմ, սակայն մեր հերոսների հիշատակն ու նրանց արած զոհողության կարևորումը բոլորիս մեջ է մշտապես։
Այսօր առանձնակի ակնածանքով խոնարհվում ենք հայրենիքի պաշտպանության համար կյանքը զոհաբերած մեր բոլոր հերոսների հիշատակի առաջ։
Ինչքան ծանր, նույնքան սուրբ օր է այսուհետ լինելու հունվարի 27-ը բոլորիս համար։ Այն լռության, խոհի և մեծ երախտագիտության օր է, երբ ամբողջ ազգով հիշում ենք նրանց, ովքեր ամենաթանկի՝ կյանքի գնով պահեցին մեր հողը, մեր արժանապատվությունն ու մեր ապագայի հույսը։
Այս օրը կոչ է ոչ միայն հիշելու, այլ նաև գիտակցելու մեր պատասխանատվությունը քաջորդիների կատարած հերոսության հանդեպ։
Այսօր մեր սրտերում են բոլոր հերոսների ընտանիքները՝ ծնողները, զավակները, հարազատները։ Նրանց ցավն ու կորուստը մեր բոլորի վիշտն է, և մեր պարտքն է լինել նրանց կողքին՝ ոչ միայն խոսքով, այլև գործով։ Մենք պետք է արարելով ու աշխատանքով, Հայաստանը շենացնելով արժանի դառնանք նրանց անչափելի վշտին ու կորստին։
Թող այս հիշատակի օրը մեզ դարձնի առավել համախմբված, առավել ուժեղ և առավել վճռական՝ պաշտպանելու մեր երկիրը, հող հայրենին, պետականությունն ու արժանի լինելու մեր հերոսների հիշատակին, թող հունվարի 27-ը դառնա միասնականության, արժանապատվության և հավերժ երախտագիտության խորհրդանիշ։
Նրանց անունները կապրեն մեր սրտերում և մեր պատմության հերոսական էջերում։
Խոնա՛րհվում եմ մեր հերոսների անմար հիշատակի առաջ։
Փա՛ռք հայրենիքի պաշտպանության համար զոհվածներին։