Շիրակի մարզպետի աշխատակազմ

Շիրակի մարզպետ Դավիթ Առուշանյանի հանձնարարությամբ շարունակվում են մարզի համայնքներ իրականացվող շրջայցերը՝ համայնքներում ընթացող շինարարական աշխատանքները տեղում վերահսկելու և առկա խնդիրներին լուծումներ տալու նպատակով։
Մարզպետի տեղակալ Արտուշ Հովհաննիսյանի գլխավորությամբ պատասխանատուներն այսօր այցելել են Ամասիա համայնք, համայնքի ղեկավար Ջեմմա Հարությունյանի ուղեկցությամբ ծանոթացել 25-րդ փողոցի հիմնանորոգման աշխատանքների ընթացքին։
Սուբվենցիոն ծրագրով հիմնանորոգվող փողոցում իրականացվել են ներքին ենթակառուցվածքների փոխարինման, նոր դիտահորերի կառուցման, ինչպես նաև ջրահեռացման համակարգի տեղադրման աշխատանքները։ Նախատեսվում է փողոցը պատել 10 սմ հաստությամբ ասֆալտբետոնե շերտով։
Այնուհետև պատասխանատուներն այցելել են Բերդաշենի միջնակարգ դպրոց, որը կառուցվել է «300 դպրոց, 500 մանկապարտեզ» ծրագրի շրջանակում։ Տեղում դիտարկել են նաև դպրոց տանող ճանապարհի կառուցման աշխատանքները։
Շրջայցի ընթացքում Արտուշ Հովհաննիսյանն այցելել է նաև համայնքային միջոցներով կառուցվող Բերդաշենի հանդիսությունների սրահ և հետևել աշխատանքների ընթացքին։
Մարզպետի տեղակալը պատասխանատուներին հորդորել է աշխատանքներում լինել առավել հետևողական և ուշադիր, իսկ շինարարներին՝ բացառել թերություններն ու աշխատանքների ձգձգումները՝ փոխանցելով մարզպետի հանձնարարականը։